Sindicato SIMAR ta preparando p’e marcha di awe, unda cu lo ta entregando un carta di mal contento contra e maneho di Minister di Enseñansa. SIMAR a reuni cu su miembronan, pero otronan cu tambe a tene reunion tabata SEPPA, SADA, SPA.
Tur e reunionnan aki tin di haber cu e mal contento riba e decisionnan tuma sin consulta, sin dialoga cu otro na mesa. Loke a confirma na e sindicato di tur esnan den e veld, cual e sindicato tabata vociferando tur e tempo aki, e disgusto di kico ta pasando y mester mustra cu loke ta pasando no por sigui asina.
Diferente desicion a wordo tuma y casi tur riba e manera unilateral desde cu COVID-19 a bin. No tabatin dialogo, no tabatin consulta, pero solamente a informa. No tabatin claridad, a bisa cosnan pero despues a haci otro, ta puntra pero no ta haya contesta. SIMAR a manda un carta y ainda no a haya un contesta riba e clarificacionnan aki. E docentenan ta kere cu mester subi no na un forma tradicional di manda carta, pero di bay tene e marcha hunto. E marcha lo sali pa 3:00PM desde ex DOW direccion Bestuurskantoor pa entrega un carta di disgusto cu tin den e veld di enseñansa.
No solamente pa enseñansa, pero e sindicato ta contento cu SPA y SEPPA lo ta uniendo cu nan. E sindicato ta pidi tur hende cu ta traha den enseñansa, miembro of no, studiantenan di IPA, mayornanan y tur otro cu ta preocupa p’e ultimo desaroyo den enseñansa y departamento publico. Segun Josephine Albertus, presidente di SIMAR, nan no a bisa cu no kier entrega, di cual tur ta dispuesto pa yuda den e crisis aki pero e mester bay na un manera husto.
Gobierno ta bisa cu no tin tempo pa tuma decision, pero mirando e carta di Hulanda tin tempo pa tuma un decision. Den e carta di Rijks Ministerraad ta poni 13 mei, despues tabatin skirbi te cu 20 mei. Tin 7 dia aunke ta compronde cu no tin hopi tempo. Pero nan por a tuma e tempo pa sinta na mesa cu sindicatonan pa dialogo y negosha. SIMAR ta haya cu tabatin tempo pa sinta na mesa y negosha algo, pero e punto ta cu ta bibando riba un pais democratico y por sinta dialoga y negosha na mesa. Tur esaki ta loke e miembronan di sindicato kier, pa sinta y duna tur informacion. Hulanda a manda un carta 13 mei y no a bisa pa duna un contesta riba e dia aki, pero tin skirbi te cu 20 mei y esaki kiermen gobierno a haya tempo pa sinta.
SIMAR kier demostra gobierno cu tur loke ta wordo pidi no ta bin di sindicatonan pero di e “achterbaan”. E “achterbaan” kier pa sinta cu otro y yega na un acuerdo. Pa haci esaki ta pidi tur hende den enseñansa y ta preocupa pa yega na ex DOW p’asina cuminsa cana pa 3:00PM. SIMAR a habri oficina desde 12:00PM pa tur docente pasa firma e carta y mustra cu nan no ta di acuerdo con cos ta bayendo. Na San Nicolas p’e docentenan cu no por a yega SIMAR, na St. Augustinus school nan por a pasa firma e lista. Tambe por pasa diaranson mainta y firma e carta. Ta e “achterbaan” ta pidiendo pa gobierno atende cu e sindicatonan manera mester ta ora ta trata cosnan asina aki.
