Cuerpo Bombero Aruba a cera nan siman di prevencion cu e famoso Open Dag 2018. E bomberonan y boluntarionan a prepara tur cos dianan prome y oranan trempan prome cu tur hende por a yega na e Open Dag. Tur hende por a disfruta di e dushi ambiente di e gruponan di baile, di e presentacion di Marshall di Paw Patrol, e diferente actividad di e trabounan di bomberonan y personal di ambulance.
E dia a bay bon unda cu e ambiente tabata hopi agradabel, Ferdinand Ponson, Officier di Brandweer, a bisa. Hopi hende a yega na post di Tanki Flip, unda nan tabata bay y regresa bek. E bar y cushina tabata bon surti durante e actividad. Muchanan tabata mira e trucknan y tabata pone e alarma di truck zona. Pa muchanan esaki tabata un emocion grandi, mientras e bomberonan tabata contento di a ricibi tur hende y laga nan experencia kico ta e trabounan.
E actividad mas gusta p’e muchanan tabata e zipline unda cu e rij tabata largo. Un otro actividad gusta tabata e truck di “hoogwerker”, unda tanto hendenan grandi como mucha tabata bay halto pa mira rond. Tambe tur hende por a mira un demostracion di e trabou di bomberonan ora cu a mustra tur hende con nan ta saca un persona cu por a cay por ehempel den un pos.
E muchanan por a saca potret cu e dalmation Marshall di Paw Patrol. Ponson a bisa cu e muchanan tabata bira contento ora cu nan tabata mira e cacho. Hendenan grandi como muchanan a haya e oportunidad di bisti e trahe di bombero y saca potret, pero tambe saca potret cu e bomberonan. P’e bomberonan e dia tabata uno hopi dushi, pasobra por a mira cu e muchanan tabata siña kico ta e trabou di bomberonan.
E Open Dag 2018 di Cuerpo Bombero Aruba tabata e ultimo actividad pa asina clausura e siman di prevencion. E siman di prevencion tabata uno hopi druk unda cu nan a bishita diferente scol basico pa duna charla. E prome actividad di e siman di prevencion tabata e Brandweer loop, unda cu e dia tabata uno hopi druk pasobra 1000 persona a participa na esaki. Tambe tabatin diferente actividad manera seso sport, domino, zaal voetbal, bowling, parada, cual ta eventonan cu hendenan a yega y pasa momentonan agradabel cu e bomberonan. A diberti na e actividadnan cu e famianan di bomberonan y asina aki tabata tin un siman fructifero. Ponson ta gradici e team di brandweer cu a traha duro, e bomberonan cu a yuda haci esaki aña pa aña mas grandi. Tambe a gradici tur esnan cu a bishita e actividadnan pa yuda engrandece esaki.
