Tres sentencia tin caba contra gobierno den cual ta ordena pa tuma cierto medida pa reduci of elimina e molester cu Manor Beach (Amsterdam Manor) ta sinti pa mas cu dos decada caba. Y tur cos ta draai rond di mal holo cu ta bini for di e planta di purificacion di awa na Bubali. Ademas di e holo, na cierto momento tin invasion di musca. Esun mas perhudica ta e hotel menciona cu a bin ta mira su ocupacion baha den tempo cu gobierno mes ta papia cu orguyo di e cifranan bunita di turismo y cual a percura pa crea hopi entrada pa baha di gobierno. Menos pa Amsterdam Manor.
Den e documentonan entrega na corte recientemente por a tuma nota cu e planta traha mas o menos cincuenta aña pasa pa procesa 4500 meter cubico di awa pa dia, awendia ta draai “op volle toeren” pa procesa 10.000 meter cubico di awa pa dia.
E proceso ta un cadena cu si algo no ta funciona, henter e proceso no ta bay bon tampoco. Ora cu ta core un auto bieu no por bay na un velocidad mucho halto pasobra cualkier momento e motor por rementa. Y esaki ta loke cu TNO a bisa gobierno na 2018 caba. E murayanan di e tankinan tin scheur. Y no a haci nada sino te cu 2020.
Imagina solamente cu e tankinan kibra. E consecuencia ta cu tur e awa sushi ta invadi sector hotelero y Playa. No solamente esey. Un gran parti di Aruba, unda gran mayoria di hotelnan ta situa, no por haci uzo di wc ni baño (e awa). Manera cu abogado mr. Patrick Brown a bisa den corte, den menos cu 24 ora e turistanan aki na Aruba lo mester bandona Aruba. Con lo haci pa saca casi 3.300 turista den algun ora for di e isla. Sin conta e consecuencia cu un noticia asina riba rednan internacional tin riba e 1.2 miyon bishitante cu Aruba ta ricibi anualmente.
Pa relato amplio lesa TREMPAN.
