Cu sumo placer y alegria ta participa y anuncia na pueblo Arubano, riba e grandioso bendicion di por a lansa riba mercado e dia di ayera, e mas reciente tema musical: “¡Si Nos Tin Fe…!” Gospel.
Tur esaki como parti di e celebracion di e 20 aña di aporte na e repertorio musical pa e temporada di Pasco y Fin di Aña aki na Aruba di e compositor J. Freddy Montoya. Tambe pa aporta grandemente cu e palabra di Dios den e temponan extraordinario cu mundo ta bibando actualmente y cu nos mester di tanto Fe, Speransa y Amor.
Ta dedica e tema aki na Dios nos Creador na kende nos ta deposita tur confiansa y cu diariamente ta inspira y cu ta duna e privilegio di por a comparti cu pasion e talento cu El a regala nos cu asina tanto abundancia.
E ta dedica e mas reciente tema musical aki na henter e pueblo di Aruba na kende cu hopi placer por a trah’e cu asina tanto amor y dedicacion, pa di e forma aki por plama e palabra di Dios y sembra un simia di Fe, den curason di tur persona cu por scuch’e y pa e cancion aki por ta un medio pa nos acerca mas na nos Creador y pa e simia aki cu nos ta planta por crece y sigui crece den tera fertil y na unda riba caminda nos por mira su frutanan cu bendicion.
Esnan envolvi ta spera cu e cancion aki lo por ta na agrado y bendicion di un y tur cu scuch’e ya cu su contenido ta dedica na e Maestro di Maestro y Autor di Pasco y cu pa excelencia nos ta profesa, e poderoso nomber di Cristo Hesus; kende ta E zeta di e lampi na nos pia y E luz riba nos caminda.
Dedica na tur persona cu for di un cuminsamento a duna un man pa por cristalisa nos talentonan y pa e empuhe den e mundo di composicion y naturalmente na e famia di Banda la Paranda na unda por a inicia y descubri e don di skirbi, pone letra y melodia na loke nos curason ritmico kier a expresa.
Masha danki na tur persona y musico cu a bisa si y cu a kere den e proyecto aki y cu di algun manera a forma parti protagonico di e grandioso soño aki cu awe a mira un realidad.
Creditonan y gradicimento: Titulo di cancion: “¡Si Nos Tin Fe…!” Cantante: Adeline Farro – Gomes.
Studio di grabacion: MrLabasose. Areglista: Dimitry Frans. Musiconan Invita: Ivan Croes, Roland Jansen. Compositor Letra y Melodia: Jhon Freddy Tobón Montoya. Coro: Xiomara Jacobs-de Windt. Richard Dabian. Aymon Kelly. Cindy Geerman. Javier Roos. Jurybeth Rijke. Guia Spiritual: Pastor Frank Daal. Iglesia Good Samaritan Cristian Center (GSCC). Suhaila Alders, DCA y Michael Arends.
Pa finalisa nos ta manda un masha danki na tur radio Locutor y Radio Stacion pa habri nan portanan pa promove e tema aki cu nos ta declara for di awo, uno hopi bendiciona.
Mensahe: Bida tin camindanan largo, cu temponan mas malo cu bon, pero cu fe de Dios nos lo vence e enemigo cu kier kibra nos.
Aunke bida y destino por trata nos malo, aunke amigo y famianan lo bandona nos y aunke cualkier tristesa lo bin bishita nos, of un dolor cu a kibra nos curason.
Aunke miedo y angustia tin biaha lo tormenta nos, den cualkier situacion cu enemigo gaña nos, ban pone nos fe den Señor, E no ta bandona nos, nunca E ta laga nos, nos so.
No tene miedo nos nos no ta nos so, pone nos fe y confia den Señor, no perde nunca speransa, ni entrega den bataya, si nos ta lucha nos por ta vencedo. Nunca perde bo fe, nunca perde speransa, nunca perde nos calor, nos paz interno y nos ilusion.
Nunca perde nos fe, nunca perde e confiansa, nunca perde e amor, cu tin cendi den nos curason.
Nunca perde e control, nunca perde e balansa, nunca perde nos luz, den Cristo Hesus nos tin salvacion.
