Dialuna 13 di april, Polisnan tabatin nan mannan yen pasobra no solamente mester a controla hendenan cu ta riba caya, pero a topa cu problema di candela tambe.
For di momento cu 9’or a bati, polisnan riba caya a cuminsa topa cu hendenan cu parce no ta compronde e nificacion di Toque De Queda. Inclusive tabatin un ex polis deteni, kende tabata 11’or di anochi riba caya.
E total di detencionnan tabata 7, un mas compara cu e dia anterior. Por bisa cu desde 2 di april e cifranan ta subi baha manera un yoyo di cual e dia mas abou tabata dia 10 di april ora cu tabatin 5 detencion.
Despues di e problema cu a surgi entre polis y habitantenan di Village, a spera cu e detencionnan lo bay ta mas, como protesta di e habitantenan, pero esaki no tabata e caso.
Te awo, faltando un siman pa e Toque De Queda cumpli un luna di su introduccion, tin 364 persona deteni pa viola e medida aki. E boet minimo pa cada caso cu Fiscal Auxiliar haya no tabata hustifica pa ta riba caminda, ta 1000 florin.