Un marinier Britanico veterano a recauda £2.000.000 ($2.514.300) p’e Servicio Nacional di Salud (NHS) di e pais, pero e tin como meta pa completa 100 buelta den su cura. E ta haci tur esaki uzando su walker.
Tom Moore, kende dia 30 di April lo cumpli 100 aña, a cuminsa cu su reto diahuebs ultimo pa recauda fondo p’e NHS Charities Together, cu ta recaudando fondonan pa hospitalnan di Reino Uni, incluyendo staff, boluntarionan y pashentnan impacta p’e crisis di coronavirus.
Su meta prome tabata di recauda £1.000 ($1.257) pa su di 100 aña y ta cana tur dia 10 buelta. Pero den 24 ora el a logra e meta y a yega £2.000.000 ($2.514.300), y e donacionnan ta sigui yega. Te cu awo Tom Moore a cana 80 buelta y ta planea di logra e 100 buelta na final di diahuebs. Moore a traha como ingeniero civil prome cu el a drenta Militar Britanico durante Segunda Guera Mundial. Su basenan tabata na India, Indonesia y Britania. Despues di su carera militar, el a bira director di un compania di concret.
Moore a cuminsa haci ehercicio tur dia despues di un reciente cambio parcial di heup y e yiu muhe a sugeri p’e reta su mes diariamente pa recauda fondo. Pa por trece conscientisacion di e fundraiser, e nieto Benji di 16 aña, a crea un account di Twitter y awo e tin mas di 20.000 hende cu ta sigui’e. Nan a splica di unda tur hende cu ta sigui’e riba Twitter ta bin y e tambe a cuminsa lesa e comentarionan tur dia.
