Awe a trata un biaha mas e ley cu ta encera e reglanan di integridad pa kandidaat-ministers y ministers. Un ley, cu manera ta indica den e ultimo conseho di RvA fecha 26 di mei 2021, RvA a conseha cinco biaha caba riba un concepto di ley cu ta trata e topico aki. Nan a duna conseho na 2015, 2017, 2018, 2020 y awor na 2021. Den 6 aña di tempo RvA a haya no menos di shete initiatiefontwerp landsverordening integriteit ministers pa duna conseho y cada biaha cu a trat’e den sala di parlamento, e no a haya e mayoria necesario pa e por bira un realidad.
E parlamentario ta compronde e reaccion di RvA na punto 1.3, den nan ultimo conseho, caminda nan ta bisa lo siguiente: “De Raad kan niet anders concluderen dan dat er sprake is van besluiteloosheid en een gebrek aan daadkracht in deze. Het onvermogen van het hoogste staatsrechtelijke orgaan van het Land om gemeenschappelijke grond te vinden en in het belang van de bestuurlijke integriteit deze materie bij landsverordening te regelen, is niet alleen teleurstellend maar roept ook vragen op over democratische volwassenheid en de wil om werkelijk veranderingen te bewerkstelligen”.
“Mi ta completamente di acuerdo cu te cu awe a keda demostra cu no tabatin madurez politico pa enberdad percura pa normanan di integridad necesario cu mester percura pa garantisa integridad, transparencia y bon gobernacion. Na mi opinion e implicacion of miho bisa e consecuencia di e aplicacion di e ley a y ta hunga un rol grandi pakico ainda e ley aki no a keda aproba. Esaki mirando cu tin di e reglanan aki lo tabatin of lo tin conseciencia pa un of mas politico”, segun Shailiny Tromp-Lee di e Fraccion di MEP.
“Pesey mi ta spera cu awe porfin lo aproba e ley. Pasobra cu nos no a logra percura pa e ley aki bira realidad di 2015 te cu awe, sigur ta manda un señal no corecto na pueblo. Mi ta di acuerdo cu RvA caminda den su conseho di dia 26 di mei 2021 e ta bisa lo siguiente: De Raad wijst op het mogelijk negatief uitstrallingseffect dat dit naar de burger toe heeft. Temeer daar dit onvermogen tot zelfregulering zich afspeelt in een periode van strafrechtelijke onderzoeken waar ex-bestuurders en volksvertegenwoordigers bij betrokken zijn.”
Esaki ta un tristo realidad mirando tur e investigacionnan andando manera AVESTRUZ, FLAMINGO Y ALOE of investigacion cu a keda finalisa caba te cu condena a cay manera IBIS. Mescos cu RvA mi tambe ta haya cu e situacionnan aki ta subraya ainda mas e necesidad y urgencia di e ley aki.
