Den e conferencia di prensa di diaranson ultimo, parlamentario di MEP, Shailiny Tromp-Lee
a elabora riba e desaroyo di deporte y specificamente riba Fundacion Lotto pa Deporte
(FLPD).
E directiva di e fundacion aki ta sinta ainda y e ta mira esaki como un debilidad pa
ehecucion di maneho, ya cu te ainda e minister di Deporte no a haya e jaarrekeningnan di e
ultimo añanan di e fundacion y tambe no a logra trece e cambionan den e constelacion di e
directiva actual. Traspaso di 23 trahado Un punto cu te dia di awe no ta cla pa sra. Tromp-Lee ta cu na 2012 a tuma lugar un cambio den e structura di Lotto, caminda a traspasa 23 trahado di Fundacion Lotto pa Deporte pa Fundacion Facilidadnan Deportivo (FFD) y cu e trahadornan aki ta ser paga for di un fondo di subsidio di 3 miyon florin di gobierno y pa cual 80% di e fondo ta pa cubri e gastonan di salario di e trahadornan menciona.
Dicon e traspaso aki y kico tabata e necesidad, siendo cu Lotto mes tabata genera placa pa paga e trahadornan aki! Lotto pa Deporte a ser lanta pa para riba nan propio pia pa ehecuta e maneho deportivo y bin na e fondonan necesario pa por ehecuta e maneho aki. Echo ta cu e traspaso di e 23 trahadornan aki, Lotto pa Deporte lo mester a resta 3 miyon florin adicional pa por inverti den deporte, pero lastimamente esaki no a sosode. Situacion penoso di e facilidadnan Siguientemente e parlamentario a trece padilanti e condicion di varios di e facilidadnan deportivo construi pa gran parti durante 2002-2009:
1. Facilidadnan deportivo na Jara, Simeon Antonio y Pos Chikito. Tur e facilidadnan aki ta den un situacion penoso, caminda mantencion no a tuma lugar durante e ultimo 8 añanan. Entre otro esun di Pos Chikito, tin waya y luznan cu ta colga y no a termina cu e proyecto aki.
2. Compleho Frans Figaroa. Pa un aña caba no tin luz pa e veld di futbol. Na 2017 a
drecha e dak cu a costa pueblo mas cu 1 miyon florin, pero ya e condicion ta di yora.
Na 2012 ora a pone e 23 trahadornan na FFD tabatin na tur facilidad un manager y
riba e manager aki tabatin un cabes. Ultimo 8 aña tabatin riba e headmanager un gran
cantidad di director. Esaki a conduci na mas gasto pa personal y menos na mantencion
y inversion deportivo.
3. Joe Laveist. Un proyecto cu a costa 4.3 miyon florin, caminda e veld no ta cuadra cu e
midinan, no ta den bon condicion, condicion di bañonan deplorabel y cu e materialnan
usa pa e dak y veld no ta apto pa Aruba. Unda e 4.3 miyon florin a bay?
4. Durante 2002 pa 2009 Fundacion Lotto pa deporte a financia proyectonan di
gobierno, manera Olimpiada Escolar, Contacto Cultural, Weganan di Reino y
bishitanan deportivo interinsular, pero actualmente no ta scucha di nan mas. Sra.
Tromp-Lee ta puntra su mes, kico a pasa cu e placa durante e ultimo 8 añanan aki di
Lotto pa Deporte, ya cu e meta di e fundacion ta pa desaroya y crea fondo necesario
pa deporte y cultura. Renegosacion di contract cu CBN E directiva actual di Lotto pa Deporte su tarea principal ta pa draai Lotto pa genera fondo. Nan mester respeta cu cambio di gobierno a bin, cu e gobierno tin un vision y maneho nobo. Mester ehecuta e maneho nobo aki. Alavez mester renegocia e contracto actual cu Canadian Bank Notes (CBN), ya cu sra. Tromp-Lee te ainda no por comprende con por a yega na un contracto asina desventahoso pa Aruba. Fuera di tur e puntonan menciona, mester tene cuenta tambe cu e gritonan di diferente organisacion deportivo. Den pasado, banda di subsidio, tabatin un post tambe na Lotto pa Deporte cu tabata yuda e organisacionnan aki cu viahenan, uniformnan y mantencion di veldnan. Hopi di e organisacionnan aki ta depende di trabao di boluntarionan, ya cu nan no tin entradanan fiho y ta depende di fundraising y rifanan pa genera fondo pa nan organisacion. Como ehempel el a duna e trabaonan cu a ser haci pa e boluntarionan na
Centro di Bario Noord y caminda e mes ta na cabes di e centro y pues sa di e dolornan.
Finalmente, mester bin cu yudansa tambe pa e luznan na e veldnan y specialmente pa e
cambio di bombiyonan cu ta un gasto hopi halto.
