Presupuesto 2018 a drenta Parlamento y como parti di e documentonan aki tambe a drenta e FEM (Financial Economic Memorandum) 2018-2021. FEM ta dilenia e direccion cu pais Aruba kier bay awor den e proximo añanan.
Den e documento di FEM por ripara cu enberdad a pone concentracion no solamente riba e parti economico sino tambe riba e parti social. Esaki Parlamentario Setty Christiaans-Yarzagaray ta considera hopi importante.
“FEM ta cuadra totalmente den e bista si un pais kier logra e metanan di desaroyo sostenibel (SDG) stipula pa Nacionnan Uni cu Aruba tambe mester logra na aña 2030. Si nos keda concentra solamente riba sanea e problemanan financiero y economico, nos lo keda neglisha e parti social manera e gobeierno anterior a haci”.
E Parlamentario ta bisa cu e parti social ta hopi importante especialmente awor cu e rapport tocante pobresa cu ta na un grado relativamente halto. Aruba su bista mester ta fiha un poco mas amplio cu simplemente riba e aspectonan financiero y economico.
E documento di FEM ta mustra un pronostico economico conservativo y esaki ta bon segun e Parlamentario. Esaki paso Aruba awe ta den e situacion cu eta, pasobra a ilusiona cu Aruba lo tin un crecemento economico mas halto y irrealistico. Ta mane mane mantene un cas door purba pleister e buraconan den muraya di cas pa hacie bunita pa hende wak pero no ta dicidi di cambia e blokinan y ni nada otro.
Como Parlamentario cu tin e trabou pa controla gobierno, Christiaans-Yarzagaray a expresa cu ta haci dolor pa wak cu un sistema di crisisheffing of un plan di recuperacion mester wordo introduci awe.
“No tawata tin hopi escohencia. Bo mannan ta hopi mara cual ta riparabel tambe den e rapport di FEM, cu ta tambe pavia di ley di Laft cu a wordo introduci danki na e mal maneho financiero di AVP ”, segun Christiaans-Yarzagaray.
Aunke cu ta di lamenta cu e cifranan financiero y e resultado economico no a cambia, Parlamentario Christiaans-Yarzagaray ta enfatisa cu Presupuesto 2018 ta contene un plan diferente y e direccion cu lo duna pais Aruba si lo cambia. E placa cu ta wordo presupuesta pa e plan aki no ta un plan cu ta solamente e Gobierno di Gabinete Wever-Croes a bin cu n’e sino tambe e vlak social mes a present’e na mirando cu e crisis social ya ta presente en especialmente cu e tragedia cu morto di dos criatura. Esaki tawata na unda e vlak social a wordo asigna door di Gobierno pa nan mes bin cu iniciativa di loke mester pa drecha cierto aspectonan. E plan ta un plan di 32 miyon florin.
Sinembargo, pa e Gobierno aki cu financieramente ta man mara, a pidi e vlak social pa ‘faseer’ esaki den 2 aña cu lo sali 16 miyon pa aña pa ehecuta e plan social.
“Ora cu ta papia di desaroyo economico di un pais, hamas mester lubida riba e parti social. E balans mester tey paso no solamente un grupo so mester sinti progreso y un grupo grandi ta wordo laga atras”, Parlamentario Setty Christiaans-Yarzagaray a duna di conoce.
