E demanda pa data ta crece constantemente. E popularidad di apps riba celular manera Whatsapp, Facebook, Instagram y Snapchat ta hisa rapidamente, cu ta aporta na un uzo di data mas y mas halto.
SETAR ta orguyoso cu awe 70% di su clientenan di celular ta riba e red di LTE y ta gosando di e speed di data mas halto na Aruba.
SETAR como muestra di aprecio na su clientenan y pa engrandece nan experiencia den e uso di celular ta regala nan extra data. E aumento di cantidad di data lo ta den tur pakete existente di celular entrante dia 1 di november 2018.
Clientenan di Postpaid U, Postpaid Regular y Hybrid ta ricibi 1 GB di data adicional den nan pakete existente. Clientenan Prepaid ta ricibi mas data den e bundelnan existente y a lansa bundelnan nobo cu ta inclui ‘Freebees’. Esaki ta duna cliente e oportunidad di Whatsapp, Facebook, Snapchat y Instagram ilimita pa 30 dia. Lo haci tur e cambionan aki automaticamente y sin gasto adicional pa e cliente.
Setar ta yama danki na su clientenan pa nan sosten den e ultimo 15 aña. SETAR lo continua su trabao pa mehora e experiencia di su clientenan. Muy pronto como parti di Setar su ‘5G Revolution’ lo hiba Aruba na e siguiente nivel di tecnologia mundial.
