Por mira ultimo dianan cu gritonan a cuminsa sali di tur skina pa loke ta hospital relaciona cu e mal trabou cu a wordo haci na e hospital nobo. Alan Howell por a compronde di trahadornan cu tin hopi aña trahando eynan, cu nunca nan a wak tanto lekage y problemanan den edificio di hospital y mucho menos lo a spera esaki den un hospital nobo.
Den cuadro di esaki parlamentario di POR lo manda preguntanan pa minister di Salubridad pa sa exactamente kico e ta pensa di e situacion aki, pa sa exactamente kico e ta bay haci cu esaki, pasobra si pueblo di Aruba a gasta miyones den traha un hospital nobo, pueblo merece di haya un hospital di calidad, cual no ta e caso na e momentonan aki.
Howell ta indica cu e minister di Salubridad lo mester duna un splicacion den Parlamento, e ta conciente cu ta algo cu el a hereda for di e gobernacion anterior, pero e como minister actual ta esun cu mester saca su som cu e mal trabou cu el a hereda.
