Minister Ursell Arends ta anuncia cu Raad van Toezicht di Serlimar SG a nombra Melitza Geerman como e directora di Serlimar entrante 1 di november 2022.
Despues di a pasa un proceso di solicitud e escogencia di e Raad van Toezicht a keda den Geerman cu tin un trayectoria amplio den sector priva unda el a fungi den diferente funcion clave tanto den management y mercadeo.
Melitza Geerman tin un Bachelor degree den Business Administration, un Minor degree den Human Resources Management & Organization Development, y Economics. Su funcion mas recien ta di Head of Commercial/ Territory Manager Aruba na Superior Tobacco Aruba N.V. afilia na Philip Morris International.
Serlimar ta den su momentonan crucial, cu varios reto hopi grandi y alabes diferente posibilidad real pa cambia e rumbo unda e patrimonio di Aruba ta bayendo. “Di mi parti mi tin e pleno confiansa cu señora Geerman tin tur e competencianan necesario pa dirigi Serlimar den rumbo pa un compania financieramente fuerte”, minister Arends ta declara.
Minister Arends ta extende su palabra di gradicimento na Madeline Lacle como directora interino den su esfuerso- y tareanan desplega den temporada hopi dificil di e compania.
E deseonan di tur clase di exito na Melitza Geerman, cu ya caba a demostra di tin e curashi pa acepta e reto y asina implementa e cambionan necesario pa salvaguardia e existencia di compania estatal.
