Dia 7 februari 2023, SEPPA hunto cu e otro sindicatonan den sector publico tabatin un reunion tocante e Prestatie Management, cual ta sistema cu gobierno kier introduci pa evalua e empleadonan publico. Introduccion di un sistema asina riba su mes no mester ta un problema. Ta normal cu un dunado di trabao kier tin metodo pa e por evalua con su empleado ta funciona. Pero e reglanan di wega of e condicionnan pa esaki mester ta na su luga y den e caso aki e sistema cu gobierno a core introduci ta keda preocupante y tin hopi empleado yena cu duda.
Gobierno a presenta e sistema aki como parti di articulo 15, inciso 2 di LMA y cu gobierno tambe a palabra den e Landspakket den cuadro di e ‘gastonan y efectividad’ den sector publico y ta acorda esaki como un forma pa wanta e gastonan tambe. Akinan nos tur mester para keto un rato. E ultimo aki di ‘wanta gasto’ ta trece duda pa cu e intencion real su tras. Pa yega e meta di wanta gasto, ta hopi cla cu un caminda tin cu entrega pa por yega na e meta di ‘wanta gasto’. Un hende tin cu sacrifica pa e otro su gastonan no subi. Pues, e meta tras di e introduccion di e sistema aki, esta pa gobierno wanta su gastonan ta mustra di tin mas balor cu loke un sistema di e indole aki lo mester produci, esta trece eficiencia, hisa productividad hunto cu un evaluacion husto pa un y tur cu su debido baloracion pa yega na un funcionamento y resultado positivo di e servicio cu e trahado a brinda. Pero akinan nos ta wak cu e meta tras di e sistema ‘no necesariamente’ lo ta uno cu ta bay ta uno husto, of ta duna e trahado ‘adelanto’, paso mester wanta gasto toch?
Na momento di introduci un sistema asina, tur condicion mester ta regla. Y no ta cuestion cu esaki nan ta yega di mes, of cu tempo. Tin diferente departamento di gobierno di cual no tin, of mester caba di drecha e descripcion di funcion, e baloracion drechi cu ta cuadra cu e temponan aki, pero tambe con trahadonan por sigui cana den nan funcion. Nos mester menciona cu pa hopi aña caba ta constantemente empleadonan publico ta pasa door di problema y te hasta bay den accion simplemente paso gobierno como dunado di trabao no ta cumpli cu e parti di ‘opleiding’ na e empleadonan pa nan por sigui avansa den nan carera. Un exigencia di e propio dunado di trabao pero pa cual e no ta cumpli y ta stroba su empleadonan. Ta e luchanan di aῆas unda ta hopi empleado publico a keda stanca!
Tin hopi mas preocupacion cu SEPPA tin pa cu e sistema aki y tur esakinan mester wordo aclaria. A bira tempo pa gobierno como dunado di trabao asumi su responsabilidad y percura cu loke sea e kier introduci ta bon regla y cu tur e condicionnan t’ey, sigur esunnan cu ta su obligacion. E sistema ainda tin hopi duda, tin su deficiencianan y ta trece consecuencianan hopi pisa pa empleadonan publico pero tambe pa e servicio cu mester wordo brinda na comunidad. No ta pornada, Raad van Advies tambe a indica esaki den su conseho na october 2022.
Na e momentonan aki SEPPA no solamente ta insisti pa e LB aki wordo para of hala aden pero tambe cu ta pone un paro na tur e combersacionnan. Nos sa cu e directornan, hefenan di servicio ta insisti pa cada un empleado publico toch participa na e combersacionnan. Nos ta pidi tur hende pa a pesar di tur e presion aki pa keda trankilo. Ta p’esey tambe pa mientras cu e ley ta na vigor ainda tambe pa ora yena e formulario pa pone acerca ‘manteniendo tur derecho di’, of ‘onder voorbehoud van alle rechten’, of ‘bao protesta’.
Pa loke ta e incertidumbre, duda riba e siguridad pa cu trabao y e presion, tur imposicion den e ultimo añanan cu ta wordo eherce riba empleadonan publico nos mester sigui lucha hunto. SEPPA di su banda lo sigui traha riba pa yega na solucion y trankilidad na pia di trabao. Ta pa e motibo aki tambe SEPPA ta urgi gobierno como e dunado di trabou pa atende cu respet y cautela pa derechonan di trahado. Pero ta bon pa empleadonan publico corda tambe, cu pa por logra nos mester conta cu e lucha di un y tur. P’esey mes keda pendiente.
