Den combersacion cu Colegio Ehecutivo di Boneiro, Colegio di supervision financiero di Boneiro, Sint Eustatius y Saba (Cft) a pidi atencion pa elaboracion di un presupuesto balansa y realistico. Boneiro ta presupuesta un deficit presupuestario den 2023, despues di a realisa pa hopi aña largo surplus presupuestario. Ta di importancia pa Boneiro duna prioridad na un presupuesto plurianual balansa y elabora un presupuesto cu ta manifesta tanto e ambicionnan di Boneiro como e forsa di ehecucion di e entidad publico.
Presupuesto di 2023
Dia 15 di november 2022 Conseho Insular di Boneiro a adopta e presupuesto di 2023 y seguidamente Secretario di Estado di Asunto Interno y Relacion den Reino a aprob’e. Boneiro ta presenta un deficit presupuestario di USD 0,9 miyon den 2023. Den combersacion cu Colegio Ehecutivo di Boneiro Cft a enfatisa e importancia di un presupuesto balansa y realistico. Door di entrada extra di impuesto turistico, aumento structural di onderstand liber (vrije uitkering) y recuperacion economico despues di e crisis di pandemia, Cft no ta mira necesidad di un deficit presupuestario. Relaciona cu esey Cft a hala atencion tambe riba e cifranan di realisacion preliminar di 2022, cual ta indica un surplus presupuestario pa 2022, y al respecto a pidi atencion pa un presupuesto realistico, teniendo cuenta cu e forsa di ehecucion di Boneiro.
Maneho financiero
Boneiro a tuma algun paso importante aña pasa pa mehora maneho financiero. Asina, por ehempel, na fin di 2022 a fiha maneho di tereno y fihamento di maneho di exoneracion tambe ta un paso den bon direccion. Tambe Boneiro a elabora un plan di accion renoba pa mehora maneho financiero. Den e plan ey, sinembargo, a hala e fecha limite pa un declaracion di aprobacion di accountant di e cuenta anual di 2022 pa 2023. Cft a enfatisa importancia di bon maneho financiero y a curasha Boneiro pa sigui fiha obhetivo ambicioso.
Cft a pidi atencion tambe pa suministro di informacion di parti di Colegio Ehecutivo pa Conseho Insular y Cft. Na varios ocasion den 2022 informacion den e reportahenan di ehecucion tabata demasiado limita pa por haya un bon bista di e posicion financiero di Boneiro. Banda di esey, no ta den tur caso a respeta e procedura pa modifica e presupuesto, manera ta prescribi den e Ley di finansa pa e entidadnan publico Boneiro, Sint Eustatius y Saba. Esaki ta limita bista di e estado di e presupuesto y ta limita Cft den su evaluacion di ehecucion presupuestario.
Aeropuerto Internacional di Boneiro
Aeropuerto ta ocupa un posicion importante den economia Boneriano. Den combersacion cu gerencia di Aeropuerto Internacional di Boneiro (BIA) Cft a tuma nota cu masha interes di e Plan Maestro 2040, cu ta dirigi riba cumplimento cu e normanan internacional di siguridad y preparacion di aeropuerto pa futuro. P’esey, den colaboracion cu Ministerio di Infrastructura y Maneho di Awa y cu Entidad Publico Boneiro, aeropuerto ta invertiendo den modernisacion di e pistanan di aterisahe, ampliacion y modernisacion di e terminal.
Entrante dia prome di februari 2023 a nombra Lidewijde Ongering como presidente di Colegio di supervision financiero di Corsou y Sint Maarten (Cft), Colegio di supervision financiero di Aruba (CAft) y Colegio di supervision financiero di Boneiro, Saba y Sint Eustatius (Cft). Cft, den su constelacion nobo, a bishita Boneiro dia 7 di februari 2023 y a hiba combersacion cu Colegio Ehecutivo y Conseho Insular, y cu gerencia di Aeropuerto Internacional di Boneiro (BIA).
