Señora Rie Corton a nace dia 8 di januari 1919, net despues di prome Guera Mundial, na Renkum aan de Rijn, Gelderland, Hulanda.
E ta bin di un famia grandi di 12 yiu di cual e ta number shete. Cu el a bira pelukera no ta nada straño, pasobra e profesion di pelukero tabata tradicion den e famia aki, durante diferente generacion. Hasta tin bisa, cu su abuelo a drecha barba di Rey Guillermo 3.
Rie tabata gusta studia y biaha. El a sigui curso na Paris. Net prome cu di Dos Guera Mundial el a casa cu ‘handschoen’, na distancia pues, cu su comprometido cu tabata na Oost-Indië. El a yega Oost-Indië cu e ultimo barco cu a sali di Hulanda prome cu guera explota. Aya el a pasa e añanan di guera den campamento di e Haponesnan, un periodo pisa y traumatico den su bida. Su esposo a fayece durante e periodo aki.
Despues di guera, na Hulanda, el a topa cu Kornelis Johannes (Kees) van Gaalen, un conoci di antes. Kees tabata polis na Corsou y e tabata cu ‘verlof’, ora nan a topa otro na Rotterdam y namora. Nan a casa y establece nan mes na Aruba. Nan adres na Aruba tabata Sabana Blanco 36, caminda actualmente e sede di SIMAR ta situa. E parti patras tabata e pelukeria di señora Van Gaalen.
E tabata haya cliente di tur parti di Aruba, asta for di Lago Colony. El a introduci hopi mucha muhe en e profesion aki. Tabata un honor grandi pa Rie, ora a pidie pa peña Reina Juliana y e prinsesnan Beatrix, Irene y Margriet. Tin algun carta masha interesante di e secretario di e prinsesnan den e buki di recuerdo di Rie.
Su coleganan aprecia tabata Maggy Laclé y Aura Croes. Nan a coopera semper cu otro cu un colegialidad caluroso. Di nan Rie tabata haya conseho relaciona cu e aspectonan tropical di su trabou y e tabata duna nan conseho for di un angulo Europeo. Esey tabata un periodo masha feliz den su bida. E mundo di pelukeria tabata inovativo y artistico. E y su coleganan tabata crea tur sorto peluca pa presentacion di balet, pa carnaval y show di moda.
E mester a regresa Hulanda na unda el a sigui cu su pelukeria. Sinembargo, cu su 80 aña el a regresa su dushi Aruba caminda e tabata sinti su mes miho.
Rie van Gaalen-Corton a celebra su 100 aña di bida diamars ultimo dia 8 di januari 2019, feliz, contento y salud, na su cas den un ambiente ameno y alegre, hunto cu su famia, amigonan cu dushi musica di Trio Los Tres y Mas y Etty Toppenberg.
Minister presidente Mr. Evelina Wever-Croes a sorprende Rie cu un bishita special pa dun’e pabien.
Tabatin mas sopresa, esta e presencia di un otro centenario, esta señor Frans Croes, esposo di su colega-amigo defunto Aura Croes. Rie y Frans, dos hende fuerte, balente y bon di salud y mente, a sinta combersa masha dushi tocante nan recuerdonan comun.
Y pa corona obra ata nan ta entrega un telegram di Prinses Beatrix cu ta felicita Rie cu su aniversario formidabel. Señora Rie van Gaalen, masha pabien!
