Awe merdia, durante un sesion di votacion den Hunta di Directiva di Camara di Comercio, miembronan a vota unanimamente pa Kawish Misier asumi e puesto di Presidente di Camara di Comercio entrante dia 1 di januari 2019 te cu 31 di december 2019. Esaki ta su ultimo aña den directiva di Camara di Comercio y como tal lo sinta den e stoel di Presidente, mientras cu pa e funcion di Vice Presidente a eligi Satish Daryanani.
Manera ta conoci, aña pasa, den forma sorpresivo, e Presidente di Camara di Comercio, Ernst Mohamed a tuma su retiro faltando algun siman prome cu su periodo termina na fin di aña. E tempo ey a apunta Kawish Misier mes, kende tabata Vice Presidente, den e funcion temporal di Presidente. Awor cu aña a bolter a tene un eleccion y den forma unanime a scoge den e funcion aki.
“Nos lo haci nos best pa traha duro na bienestar di nos clientenan y di economia di Aruba engeneral”, esey tabata su prome palabranan ora cu a yam’e awe merdia pa pidi’e su comentario un rato despues di su eleccion na Camara di Comercio. E ta contento di por sirbi su pais di e forma aki y pa promove mas hacimento di negoshi na Aruba.
Siendo un hoben na cabes di Camara di Comercio, lo por spera mas enfoke riba innovacion y riba entrepreneurship na Aruba, locual sin duda a haci hopi falta e ultimo añanan. Un di e motibonan ta e “red tape” inmenso cu tin pa por habri un negoshi na Aruba, locual sin duda ta descurasha comerciantenan local mes pa haci negoshi, corda e stranheronan cu tin interes pa inverti aki na Aruba.
Pabien na Kawish y spera di tende mas di dje den e tempo nos dilanti, cu mas evento pa nos hobennan, manera entre otro e Creme de la Creme event cu el a bira asina popular pe e ultimo añanan aki.
