Pa klousurá e siman di medioambiente 2019 Selikor NV a planta un palu di Tabebuia na Albert Schweitzer VSBO na Parera. A planta e palu akí pa di un manera simbóliko stimulá nos hóbennan pa stima nos medioambiente i yuda protehá esaki.

Manera ta konosí e di tres siman di luna di òktober ta siman di medioambiente  aki na Kòrsou. Un di e inisiadónan di e siman di medioambiente tabata sra. Gladys van Dal Mc Kenzie, den felis memoria. Gladys ta bon konosí den e mundu di medoambientalistanan komo un di e defensornan prinsipal di nos medioambiente lokal. Na bida, tur aña Gladys tabata planta un òf mas palu na diferente instansia i asina demostrá su amor pa Kòrsou su medioambiente.

E aña akí e siman di medioambiente a kore di 14 pa 18 di òktober i pa klousurá e siman Selikor NV a duna honor póstumo na Gladys plantando un palu di Tabebuia na Albert Schweitzer VSBO. Loke ta hasi e gesto akí asina bunita ta ku e plantamentu a sosodé eksaktamente riba 18 di òktober ku ta fecha natal di Gladys, kende lo a kumpli 90 aña si e tabata na bida.

Den kompania di algun miembro di famia i representantenan di Albert Schweitzer VSBO a panta e Tabebuia ku ta un palu famia di Kibrahacha. Pa Selikor e karakterístikanan di kibrahacha tin hopi similaridat ku e personahe di Gladys i pa e motibu akí a skohe e Tabebuia pa regalá e skol.

Selikor NV ta spera ku mas organisashon por sigui e ehèmpel akí i duna un kontribushon na kuido di nos medioambiente.

Comments

comments