Dialuna anochi, 1 april 2019 a tuma lugar e segundo dialogo publico di ‘Aruba Institute for Good Governance and Leadership’ (*GG&L) den Aula di Universidad di Aruba.
E topico di e segundo dialogo publico tawata ‘Bon gobernacion y integridad’. Como un instituto nobo di Universidad di Aruba *GG&L lo organisa mas actividad informativo pa publico en general, pero tambe pa profesional den sector publico y priva. Den e caso aki e grupo di enfoke lo ta politico, academico, administrador y miembro di directiva.
Dr. Glenn Thode, rector di Universidad di Aruba, a habri e anochi y a fungi como maestro di ceremonia y moderador di e anochi. Despues di e apertura di e segundo dialogo publico Dr. Thode a pasa palabra pa e orador principal di e anochi, Sra. mr. Evelyna C. Wever-Croes LL.M., Prome Minister di Aruba y Minister di Asunto General, Integridad, Energia, Inovacion y Organizacion Gubernamental. Prome Minister Wever-Croes a duna di conoce cu e tin varios aña ta enfoka riba transparencia y principio di bon gobernacion.
E ta di opinion cu esaki ta un di e retonan di mas grandi y di importancia pa Aruba. Prome Minister Wever-Croes ta kere totalmente cu mester desaroya pilar di integridad pa reenforsa e idea di bon gobernacion y combati corupcion. Prome Minister Wever-Croes a splica cu Oficina di Integridad, Camber di Integridad y Codigo di Gobernacion Corporativo ta tres entidad cu ta bou di desaroyo actualmente pa logra preveni corupcion, crea conciencia y tene representante gubernamental y trahador publico responsabel pa/cu actonan corupto of soborno.
Tur punto menciona (tres entidad cu ta den desaroyo ta importante tumando den consideracion cu) ta meta pa wordo alcansa tumando consideracion cu Aruba ta den un situacion financiero delicado. Esaki ta pasonan cu ela describi como un reto pa transparencia den gobernacion. Prome Minister Wever-Croes a conclui door di expresa cu lo importante ta tuma accion den un forma sano y honesto sperando participacion di comunidad en general incluyendo miembro di mundo academico y tur partido concerni.
Despues di e charla di Prome Minister Wever-Croes, Dr. Robin DiPietro, profesor di ‘University of South Carolina’ a dirigi su mes na e publico tocante e topico di e anochi. Dr. DiPietro cu pa algun aña ta un “visiting fellow” na Universidad di Aruba a comparti su punto di bista tocante e topico y a enfatisa e importancia di pensamento colectivo den relacion cu integridad. E punto cardinal cu Dr. DiPietro a trece dilanti ta cu un comunidad mester boga pa crea consenshi colectivo pa asina hunto logra elimina corupcion y desaroya un base di principio cu un comunidad den su totalidad ta idenfitica su mes cune. Despues di su presentacion ela participa hunto cu Prome Minister Wever-Croes den e dialogo publico cu e audiencia y a contesta pregunta di e publico.
E aña aki *GG&L lo ofrece mas dialogo publico cu diferente topico den area di bon gobernacion. Algun di e topiconan aki ta; liderasgo responsabel, colaboracion y cooperacion den servicio publico. E siguiente dialogo publico lo tuma lugar dia 14 di mei 2019 y e topico di e dialogo aki lo ta; responsabilidad publico y gobernacion participativo. Pa mas informacion di e actividadnan organisa pa e instituto por bishita e website http://www.ua.aw/goodgovernance. Riba e website aki ya tin e presentacion digital y grabacion auditivo di e dialogonan publico cu a tuma luga dia 6 di maart y 1 di april.
