Ton Kolman ta un di e miembronan di directiva di e Asociacion di Parkinson Aruba. Nan ta hunto cu demas miembronan boluntario y ta trahando duro pa tene charlanan importante rond di e malesa di Parkinson. Biaha pasa nan a keda satisfecho cu e resultado. E biaha aki, dia 11 di April tin un otro charla.
Kolman ta conta cu tin un necesidad hopi grandi pa informacion. Entre 100 y 200 hende na Aruba tin Parkinson. Tin como 50 registra. Fin di aña tabata tin un charla cu dr. Weiser. Door di su entusiasmo y cooperacion di prensa, a haya un audiencia hopi grandi.
MFA Santa Cruz tabata chikito pa esaki. Pesey awor aki, otro siman ta bay na MFA Paradera. Lo percura pa un escenario. Lo percura pa biemer den halto, lo percura pa microfono pa tur cos bay bon y pa e hendenan por haya e informacion mas miho ainda.
Ta spera cu tur hende ta bay, famia, pashent, hende cu conoce cu tin Parkinson. Hende cu ta interesa pa join e directiva, pasobra nan mester di hende pa yuda e pashentnan y nan famia.
Kolman a splica cu otro siman, 11 di April, ta dia Mundial di Parkinson, e charla lo ta pa 6’or y mey na Paradera.
Dicon Asociacion
E asociacion a wordo funda mas di 20 aña pasa pa defunto sra. Berlinski. E tabata un amiga cu Parkinson y el a wak e necesidad pa yuda e hendenan y pa duna informacion.
Via hopi dama di Women’s Club e tempo ey, el a wordo estableci y a sigui cun’e. Te cu aña pasa tabata un tiki down den nan actividadnan. Pero ta purba di lanta e organisacion bek. E pashent mester di ayudo y e informacion y famia tambe ta hopi importante p’e. Tin un dokter neurologo specialisa, cu ta hopi entusiasta pa yuda e asociacion pa duna e pashent informacion y ta aprecia esaki masha hopi.
Yamadanan
Kolman a splica cu e ta haya for di November aña pasa, despues di charla, cada pasa un siman ta haya reaccion di un pashent nobo. E grupo di pashent cu ta registra, ta aumenta. Esey ta bon, segun Kolman. No ta un malesa cu bo ta haya riba caya. E ta algo cu por pasa tur hende. Nan no sa precies kico ta e causa y tur hende por haya. E ta hopi importante for di comienso cu bo ta haya bo tratamento di dokter pa wak cua pildo ta bon pa bo haci bo movecion, si ta posibel, pa bo bay pa wordo opera na Bogota.
Porcierto a haya noticia di un pashent cu a wordo opera, cu ta bay hopi bon. E ta hopi importante pa acudi na dokter, pa dokter diagnostica cu bo tin Parkinson, pasobra e no ta facil pa detecta cu e ta asina.
E charla lo bay tin hopi informacion y ta bay purba di motiva e pashentnan y nan famia pa boostnan un tiki, segun Kolman.
