Autoridadnan di Venezuela a informa awe mainta cu den oranan di marduga forsanan di siguridad di Estado Venezolano a haya nan mes cu un “invasion maritimo” na costa La Guaira di parti di un grupo “terorista” Colombiano. Esaki ta loke Minister di Interior, Husticia y Paz Nestor Reverol.
“Nos kier informa y denuncia cu den oranan di marduga awe, 3 di mei, nan a trata di realisa un invasion via di lama. Un grupo di mercenario terorista procedente di Colombia. Cu e meta di comete actonan terorista na e pais, asesinato di lidernan di Gobierno revolucionario, aumenta e cadena di violencia y genera caos y confusion bou di e pueblo. Y cu esaki haci un otro intento di golpi di estado,” Reverol a bisa.
“E teroristanan aki a trata di drenta via Fast-Go via di costanan di estad LaGuaira pero danki na e reaccion efectivo di nos Forsa Arma y di e Forsanan di Accionnan Special (FAES) nan a wordo derota y algun deteni. Tambe a confisca armanan di asalto, cualnan despues nos lo duna mas detaye di nan, ya cu e operacion ta andando ainda. No ta descarta mas detencion ya cu ta haciendo un investigacion minucioso via tera, lama y aire,” e Minister a bisa.
Den e operacion a mata algun di e supuesto Colombianonan, mientras cu otronan a wordo deteni, a confisca. Reverol a bisa tambe cu na nta atento y den alerta permanente pa cualkier menasa y a culpa Merca pa e hechonan aki. E minister no a menciona nada di e motin na Guanare, unda te cu awo tin 75 herido y 47 morto y tampoco di e tiroteonan na Petare.
