Cu sambechi a atraca dama entrenando riba Watty Vos Blvd

Diadomingo mainta a sosode un atraco arma riba E.J. Watty Vos Blvd. E victima, un señora, a bay su cas na Tanki Leendert y eynan a fia telefon di su casa pa bati alarma despues di casi un ora cu e atraco a tuma luga. E atracado a bay solamente cu celular di e victima, pasobra e no tabatin placa cune.

E victima a conta Polis cu e tabata canando riba E.J. “Watty” Vos Boulevard, ora a atrak’e. Un homber desconoci a acerk’e cu un sambechi y a kita su celular. Placa no a hiba pasobra e no tabata tin cun’e. E dama a keda basta spanta y Polis na e cas a solicita tanto Atraco Team pa investiga como tambe slachtofferhulp pa brinda asistencia y sosten na e victima.

Recherchenan awor tin e tarea dificil pa saca afo con e atraco a tuma luga, na unda, ki ora y unda e atracado a core bay despues di a horta celular di e señora. Como cu el a keda sin celular, a dur’e un ora largo prome cu a yega cas y bati alarma. Ta evidente cu falta algun detaye importante pa hinca e puzel aki den otro.