E homber Ansly Croes a haci menasanan serio riba Facebook y diabierna atardi a keda deteni door di Team di Aresto. Croes a comparti un publicacion di 24ora.com relaciona cu e problema existente entre Olde Molen y Polis, cu a conduci na detencion di dos persona.
Den e publicacion ey cu el a comparti, el a lansa menasa serio. “Guera nos ta bay contra polis, Gobierno y militar Hulandes, aki tres siman mey anochi. Ta bay bin the purge, esun cu nos haya riba caya mey anochi ta wordo mata. The purge is coming”.
Manera por lesa, ta palabranan peligroso cu Croes, kende ta un guardia di siguridad na un hotel grandi, a expresa riba un diabierna riba Facebook, compartiendo e articulo di 24ora.com
E publicacion a yega den man di autoridadnan cu a cuminsa un investigacion despues di e publicacion di 21 di juni. Net un siman despues y den un forma di sorpresa a tira man riba Ansly, kende manera por a mira, no a sospecha mes cu nan tabata biniendo p’e.
KPA inmediatamente na momento di e detencion, manera den “real time”, a manda e siguiente informacion pa prensa: Awe diabierna e team di aresto a detene e sospechoso A.C. pa un caso di menasa contra polisnan y militarnan. E caso aki tabata bao investigacion di atraco team na unda awe el a keda deteni. Mirando cu e lo por ta un persona peligroso a haci uzo di e team di aresto. Despues di su aresto a transporte pa sede di Recherche den Frankrijkstraat, unda a procesa su papelnan.”
