Konforme e maneho di Minister di Hustisia, sr. Quincy Girigorie pa pa revisá nos sistemanan di resosialisashon. Esaki pa asina ku esnan ku kometé un krímen i haña un kastigu di prizòn por bini den kontakto ku programanan integral i efektivo di formashon pa asina evitá residivismo.
Resosialisashon mester inisiá for di momentu di detenshon. Den e kuadro aki, S.D.K.K. ta den un proseso pa wòrdu ekipá pa por traha riba e formashon i desaroyo di e klientenan debidamente durante di nan detenshon. E trayekto di formashon aki ta kana pareu ku esun di trahadónan di SDKK, riba e tereno spesífiko di resosialisashon, ku tur dia ta den kontakto ku e kliente. Prevenshon i resosialisashon mester ta dirigí pa gran parti riba hóbennan. Ta p’esei SDKK ta den e proseso pa sigui introdusí trayekto di edukashon i formashon riba nivel, en espesial pa e grupo di hóbennan detené ku no a haña un bon guia i formashon na kas.
Durante di e aña eskolar sèptèmber 2017 te ku yüni 2018, SDKK a inisiá kuater trayekto piloto kaminda ku 32 kliente por a inskribí i partisipá. Motibu di e kantidat mínimo/máksimo aki tabata paso: ta trata di proyektonan piloto, mester a salbaguardiá e seguridat durante di e momentunan di lès i e posibilidat pa aloká mas klientenan den e lokalidat tabata na e momentunan ei no tabata posibel.
Ta trata di e siguiente fishinan: sastreria, lasdó, furadó i karpinté. Finalmente SDKK a finalisá e trayektonan ku 19 studiante, di kual 15 a graduá ku un diploma. Ta trata di 15 riba nivel 1 di SBO i 4 riba nivel 2 di SBO. Es desir 3 kosedó, 6 lasdó, 4 furadó i 6 karpinté. Pa kada un kliente e proseso di estudio tabatin su propio retonan individual. Asina ta ku un par di kliente a kai afó dor di diferente faktor/motibu. Ta trata entre otro e disiplina nesesario pa keda di focus riba bo estudio lòs di tur kos ku ta pasa ku bo durante di bo detenshon. Tambe tin klientenan ku a preferá di tuma un trabou den SDKK pa por ehèmpel hasi limpiesa òf yuda den kushina, pa asina nan por tin un entrada. Tambe tabatin kliente ku a hasi nan mes kulpabel na aktonan kastigabel ku a prohibí ku nan por a kontinuá. Kada grupo di estudio tabatin su propio karakterístikanan. Por ehèmpel e grupo di lasdó a start komo un grupo hopi uní i a keda uní te na final. Tabatin 2 studiante ku a yuda e grupo hopi bon ku sosten i konseho ku tur por a logra huntu.
Un studiante hóben ku no ta komprondé Ulandes bon i ta slou den e parti di teoria, a haña un sosten enorme serka un kliente ku a tuma boluntariamente riba su mes pa tradusí tur lès ku tabata tin mester pa e hóben studiante tambe por a sigui i finalisá e studio ku éksito. Por sierto e kliente hóben aki a resultá di ta e esun ku a destaká na final di e aña eskolar aki. Di unpersona ku no tabata sa nèt nèt nada, den unu ku hopi talento. Tambe tabatin un studiante ku a sa di demostrá abilidat di lasmentu tremendo, dor di krese personalmente i a sa di duna produkshonnan limpi i nèchi komo lasdó. E grupo di karpinté tabata parse den komienso ku e lo no a logra i ku e grupo lo a kai for di otro. Nan a demostrá ku nan por a sera kabes, disipliná otro i sostené otro i asina nan a bira un grupo tòg. Den e grupo aki tambe tabatin un studiante ku a destaká. Aunke e no tabata sa e kosnan, e tabata tuma hopi tempu pa komprondé e materianan. Tur dia di nobo e tabata bai lès ku smak. Despues a resultá ku e
tabatin mester di un brel pa e por a lesa I mira bon.
Te ora ku a logra traha un brel p’e e tabata uza un lupa (vergrootglas) pe asina e por a siña su lèsnan. E a perseverá i a logra su diploma. E grupo di sastreria ta e grupo ku por sierto a eksigí mas atenshon, ya ku mester a invertí tempu den kombersashonnan pa nan por a perseverá den nan studio. Den e grupo aki e kliente di mas yòn a demostrá di ta un persona hopi disipliná, ku ta presente tur momentu na lès i ku ta traha duru. Finalmente e grupo di furadó tabata e grupo a sa di sostené otro for di komienso i a pasa den diferente opstákulo. Un grupo ku hopi talento i ku ora mester ta traha bon huntu. E grupo aki a sa di lusi ku nan sifranan haltu ku nan a skor na eksámen. E lèsnan a wòrdu duná dor di trahadónan di SDKK ku ta enkargá komo dosentenan di fishi den e diferente lokalidatnan di trabou ku SDKK tin na su disposishon. E lèsnan a wòrdu kontrolá i kordiná dor di dosentenan di Feffik. Tambe a hasi uso di diferente dosente riba e terenonan di lès di – Papiamentu, Ingles, informátika, aritmétika/matemátika i abilidatnan sosial.
Si nos para ketu un ratu na e parti di abilidatnan sosial, mester remarká ku durante di e periodo eskolar aki, Tim di Maneho di SDKK a bolbe enfatisá kon importante e formashon di e hende mes, komo ser humano, ta. Banda di duna e kliente espasio pa e siña un fishi, bo mester duna nan e formashon mental i esun di komportashon tambe. Nan mester siña kon pa dil ku otro hende, dil ku nos leinan vigente, di ta ta fleksibel, kon hasi eskohonan positivo den bida, kon presupuestá, yega trabou na ora, komportashon na trabou, un vokabulario positivo, étika di traha, kon manehá bo tempu liber i finalmente pone prioridat na kosnan ku en bèrdat ta importante na kosnan ku den nos komunidat pa uni nos asina nos por kombibí. E ora ei bo a duna nan e pakete kompleto. Durante di e diferente kombersashon ku invershonista i komersiantenan, esaki tabata un di e di atenshon ku a wòrdu ripití ku énfasis. Minister Girigorie tabata presente dia 12 di yüli último, oira ku a hasi entrega di e diplomanan den SDKK. Minister Girigorie a felisitá i alabes enfatisá serka e studiantenan pa nan, lòs di loke a pasa ku nan ta detené den SDKK, pa nan hasi uso di tur posibilidat den kuadro di resosialisashon/formashon i tambe perseverá pa asina durante di e periodo aki nan saka lo mas mihó di nan bida i di nan talentonan. E fase di proyekto piloto a pasa i awor SDKK mester prepará su mes pa formalisá i stabilisá su propio instituto di studio interno kaminda a base di e talentonan di e klientenan, e nesesidat riba e merkado laboral, huntu ku institutonan eksterno ku ta ofresé estudionan spesífiko i tambe a base di e nivel di konosementu di e klientenan di SDKK.
SDKK su Tim di Maneho lo pèrkurá pa kaba ku e preparashon nesesario pa asina por ofresé estudionan riba nivel, ku lo mester dura 12 luna, akreditá i validá dor di Ministerio di Enseñansa, Siensia, Kultura i Deporte. Den e kuadro aki ekolaborashon entre e Ministerio di Desaroyo Sosial, Bienestar i Empleo i Asosiashon di Dunadónan di Trabou na Kòrsou, ta inevitabel. Mester duna insentivo na sektor privá pa e hóbennan aki realmente por haña un segundo oportunidat. Un nota positivo durante di evaluashon di e aña eskolar ku e klientenan e studiantenan aktual di SDKK a manda un par di konseho pa Minister Girigorie i Tim di maneho di SDKK. Na promé lugá, kuminsá traha konhuntamente ku komersiante/invershonistanan lokal i internashonal pa asina durante di e periodo di estudio den SDKK nan tambe por wòrdu di skout pa asina nan tambe por sali ku un trabou i un prueba di bon kondukta den nan man. Na di dos lugá, e deportamentu ku nan ta yama JOVO (jong volwassenen) den SDKK kaminda ta akapará e hóbennan entre 18 pa 24 aña, pa duna nan un programa di dia dirigí riba esosialisashon/formashon.
Na di tres lugá, nan ta di opinion ku e hende muhénan den SDKK tambe mester por haña e oportunidat pa atkirí un diploma meskos ku nan. Na di kuater lugá, pèrkurá pa e kontenido di e estudionan ta na Papiamentu. Asina e kliente ku ya ta un dròp out kaba por kapta e lèsnan i e materia mas mihó i por ta mas sigur di su mes. Pa esaki por ta eksitoso mester bini tambe ku programanan di konsientisashon pa komunidat kompletu pa mustra kon importante e integrashon i aseptashon den nos komunidat ta. SDKK ta bai e reto pa kambia i/òf ahustá e imágen aktual ku komunidat tin di èks-klientenan di SDKK. E imágen nobo mester kondusí nan un aseptashon digno i real.
