Un reunion larguisimo entre sindicato di maestronan SIMAR y Minister di Enseñansa a conduci na un acuerdo riba e ultimo obstaculo cu tabatin e maestronan preocupa. Ta trata di e mudansa di Scol Paso pa Futuro.
Diasabra den oranan tempran di mainta a cuminsa e reunion entre un delegacion di SIMAR y otro di Ministerio di Enseñansa encabesa pa Minister Rudy Lampe. E reunion aki a bini riba iniciativa di Prome Minister Evelyn Wever Croes despues cu a logra yega na un acuerdo cu e sindicato SIMAR riba tur e otro puntonan di preocupacion pa loke ta tumando luga den mundo di enseñansa.
Alrededor di 2’or di merdia a logra yega na un acuerdo caminda a haya e palabra di Minister Rudy Lampe cu Scol Paso Pa Futuro no mester muda for di e edificio den cual nan ta situa awo, patras di Postkantoor, si nan tin 144 alumno of mas.
SIMAR ta gradici tur esnandi veld y di parti di Gobierno a pone esfuerso di nan banda pa e partidonan logra yega na un acuerdo pa por trece trankilidad atrobe den enseñansa mientras cu ta prepara pa traha hunto y yega na un maneho, un maneho cu mester yega na dje a base di dialogo.
