Durante e conferencia di prensa diabierna anochi di Gobierno riba e tema di COVID-19 y e crisis cu el a causa, Prome Minister Evelyn Wever Croes, a expresa su preocupacion pa cuentanan cu un grupo grandi di cliente tin habri na WEB y ELMAR.
E mandatario a splica cu e companianan di utilidad a constata cu e ultimo lunanan cu no solamente esnan den fase a tuma moratorium, pero casi henter Aruba a tuma moratorium riba pagonan na WEB y ELMAR. Esaki a crea un problema gigantesco pa e companianan aki.
E hecho aki, el a bisa, ta lamentable, pasobra tin un grupo cu no a bay asina atras den entrada y por a sigui cumpli. Esaki ta algo cu ni Gobierno ni e companianan di utilidad a spera di lo bay pasa.
A yega momento cu nan mester cuminsa cobra. Den e prome pago di FASE ta papia di 9000 persona, kendenan un gran parti a pasa despues pa subsidio di salario. Awo cu e di dos pago di FASE ta trata di un grupo di mas o menos 3000 personal. Pa e grupo aki lo bay trata di mira pa nan haya un tipo di areglo cu nan por paga poco-poco. “Mi kier a haci un apelacion na henter Aruba. No ta pasobra nos ta den crisis bo ta tuma e decision cu no ta paga WEB of ELMAR. Nos mester paga pasobra si perde nan, nos lo tin un crisis di berdad. Ta haci un apelacion na tur hende pa cumpli mas tanto posibel cu boso debernan. Esnan cu a perde tur nan entrada y ta depende di FASE, por purba haya un areglo di pago mas suave. Pero e mester ta registra na FASE.”
A pidi e companianan estatal pa coopera cu e grupo aki. Esnan cu no a bay asina atras den entrada mester paga.
