For di “The Old Man and the Sea” pa “Aruba Ocean Villas”….un cambio di destinacion, pues for di un restaurant pa un hotel riba lama, estilo “bora bora”. Aunke hopi bunita y innovativo pa Aruba, ta parce cu e bisiñanan no ta contento. Parce cu den e proceso, lo a corta mangelnan y destrui naturalesa. Cu e keho ey riba mesa, Savaneteronan awor a anuncia un accion di protesta diasabra awo.
Un grupo di ciudadano, di principalmente Savaneta, ta preocupa cu cierto desaroyo den nan bario, entre otro construccionnan exagera den e bario, poniendo naturalesa un banda. Jerry Schwengle a splica di e intencion di Savanetero ta pa forma un organisacion oficial pa defende interes di nan bario.
El a papia di un rapport di prome di juli aña unda ta señala diferente cos ilegal a tuma luga na e proyecto hotelero na Savaneta. Un area unda cu tabatin un restaurant cu a convirti’e den un proyecto di acomodacion. Schwengle ta menciona cu den e rapport ta para cu cierto trabounan a wordo haci den forma ilegal, sin cumpli cu e rekisitonan di ley.
Tin problemanan cu ta data desde 2016 y esakinan nunca a wordo soluciona. A duna conseho pa pone un paro na e trabounan, pero el a sigui. Ni un rapport di MER no a traha. Tur cos cu tin poni ta haci contra ley. El a bisa ta manera nan no ta bal nada, cu ley no ta conta p’e.
Ta trata di Aruba Ocean Villas unda cu ta nan ta sali for di nan tereno y esey nan ta haya cu ta trece otro cosnan den pueblo, caminda e persona ta biba lekker. Tur esnan cu ta biba pabou di veld La Fama, santana di Savaneta bin Zuid, lo sufri di awa dia cu tin yobida. Ta mustra cu e lo bay lama, pero e awa lo dal den un plok cual lo keda yena y haci daño na otro casnan.
Nan preocupacion ta cu den e rapport ta poni strobamento di awa, pero awo ta mira cu a corta matanan pa haci paden bunita. Nan tin pruebanan cu a yega corta e matanan, di cual a kita casi 1 septimo y uza. Si ta paga belasting ta otro cuenta, pero aki tin 1 tereno so registra mientras ta haciendo negoshi cu e otro pida terenonan sin derecho y deber di paga belasting.
Mayoria rapport ta dirigi na un señora O. Henriquez, segun Schwengle. E señora a yega saluda y kier a bah’e for di un tereno cu el a kere ta di dje. E hendenan ey banda a cansa di e actitud di sinberguensa, pero lo cuminsa para duro. Nan kier pa gobierno haci algo cu e rapport y piki e cosnan. E Savaneteronan lo reuni diasabra na Centro di Bario y cana bay protesta contra e situacion aki.
