E santana di gobierno den Caya Eresto Petronia ta bolbe den noticia. Un carpachi exponi riba un kelder a laga nos reporteronan cera conoci cu e bida real den santana. Manera bo drenta por mira e poco sushedad na entrada y ora dal algun stap mas ta topa cu un bida completo den santana. Un santana deteriora. Un santana cu a bira un garashi di bicicleta pa choller. Un santana caminda cachonan ta drumi riba graf. Un santana caminda chollernan ta sosega y haci’e nan cas mientras nan ta na bida.
E problema social ta haci e santana un hogar pa esnan na bida. Y loke mas ta resalta ta e restonan humano cu ta ser exponi riba kelder cu tin den e santana. Algun luna pasa BCI a laga nan ploeg bay den accion y a duna e santana un limpieza total. Dimes e mantencion regular no ta tuma luga y esey ta causa cu den corto tempo atrobe e santana ta deteriora. Berdad ta hendenan cu a muri y no tin bida mas. Esey no kiermen cu despues di bida mester bira lomba pa nan y laga nan benta den un santana deteriora. Logicamente famianan tambe por duna un man y zorg pa e area rond di kelder di nan ser keri keda limpi.
Gobierno tin un rol tambe logicamente pasobra ta santana di gobierno. E ta mustra fastioso pa wak kico ta final di bida di un ser humano despues cu nan yega den santana. Bida a caba y parce bo ta wordo benta y lubida. Pa colmo tin henter un bida otro tambe ta draai den e santana di gobierno. Por mira claramente con adictonan ambulante ta haci uso di e santana pa nan cas di sosiego pa falta di un hogar. Esey no nifica cu mester drenta y core cu nan sin cu nan ta wordo yuda. Mas tanto e mantencion y deterioro den e santana ta loke mester duna atencion.
