Diamars atardi pa 6:20 pm un vuelo di for di Bogota, Colombia a baha na Aruba. Wingo cu su vuelo P57004 a baha na ora y tabata plania pa sali for di Aruba bek pa 7:35 pm como P57005. E vuelo for di Aruba pa Bogota a cancela na momento cu un stewerdess a ricibi complicacion cu su orea. Hopi sanger tabata sali for di su orea, pa cual a transport’e pa hospital p’e ricibi atencion medico avansa. Si tur cos a bay bon, un total di 116 pasahero lo a biaha pa Bogota, Colombia. Di e 116 pasahero, diesshete di nan tabata local. E pasaheronan no tabata contento cu e anuncio.
Durante entrevista cu e pasaheronan, a conta cu a ricibi awa cayente sin ijs y cu e aerolinea no ta para responsabel pa nan vuelo di conexion cu nan tin desde Bogota pa otro destino. Na dado momento e situacion a bira basta tenso cu siguridad di aeropuerto no por a domina e situacion.
Tabatin por lo menos un pasahero cu hasta kier a tira copi cu awa riba un di e representantenan di e aerolinea na Aruba. Ta suficiente motibo pa avisa polis di e situacion. Un total di cinco patruya di polis a presenta pa domina e situacion.
Di otro banda, aerolinea ta sigura cu a trata e pasaheronan bon. Tur pasahero a ricibi awa friu cu ijs y un snacks mientras tabata warda riba decision di e piloto, pa wak si e vuelo ta sigui of no. 99 pasahero a ricibi un camber di hotel gratis cu aerolinea a para responsabel p’e. A percura pa bus grandi cu airco busca nan fo’i aeropuerto y hiba nan hotel, mesun cos lo pasa ora di busca nan diaranson pa e vuelo cu lo sali pa Bogota.
Capitan a pidi su disculpa na e pasaheronan, sinembargo e situacion no ta den su man. E pasaheronan tabata rabia cu nan lo perde nan vuelo di conexion y cu Wingo no ta para responsabel p’e gasto aki.
Manera ta conoci Wingo ta aumento su vuelonan di Aruba pa Bogota, cu vuelo directo y den luna di october a anuncia caba cu lo inicia dos vuelo semanal pa Medellin, Colombia. Tin cu subraya si cu Wingo ta conoci pa ta un aerolinea di costo abou, cual tin ora, por tin su riesgonan cu ne.
