Cu e hecho cu minister y leiding ta neglishando e trahadonan di Douane, ta haci cu SADA ta preocupa. Awo mas ainda cu inecesariamente minister ta hibando nan corte, despues cu nan a tene un accion di dos dia, pa e simpel hecho cu nan no ta di acuerdo cu nan lo kier elimina un nachtdienst, caminda cu dos trahado ta funcionando.
Eduard Maduro a expresa cu no ta solamente e hecho cu no tin avion ta baha esey ta nifica cu e trabao di Douane ta keda te ey. Tin mercancianan cu ta wordo confisca cu por bal masha hopi placa y ta den man di Douane. Un security no por bin haci e trabao aki. Ken cu ta por cana kibra den aeropuerto, forsa e schuifdeur, cual a yega di sosode den pasado, y bay cu cos.
E minister en todo caso a manda cierto mensahe pa cierto coleganan cu ainda no tin un Landsbesluit. Esey ta pa esnan cu ta drentando nobo. Segun Eduard Maduro, el a compronde cu el a bisa esaki durante e rueda di prensa. E ta lamenta cu kisas sea management team ta mal informa e minister, of e minister en berdad no ta compronde con cuerpo di Douane ta hinca den otro.
E rango di mas abao cu tin den Douane ta hulpcommies. Ora bo wordo aangesteld como Douane Ambtenaar, esey ta e rango cu bo ta bay haya te ora cu bo keda cla cu e opleiding, e ora bo ta bay den un otro rango.
E hendenan aki tin un aña ta cobrando. Ta ambtenaar nan ta. E Landsbesluit ta un formalisacion di e dienstverband di e persona cu gobierno. E personanan aki e opleiding a rond af caba. E unico curso, manera e minister a yama, ta un vak cu nan tin cu sigui’e. Pero e no tin ningun consecuencia pa loke ta nan benoeming. Kisas e minister a wordo mal informa, pasobra e personanan aki ta bisti uniform, nan a wordo ingedeeld den warda. Si nan no ta douane, si nan no ta ambtenaar, e ora nan no mag haci control riba barco of maleta di pasahero. E ta hopi contradictorio con e minister ta trece cos padilanti pa purba di sea spanta nan of kisas di berdad, e no sa con e cos ta hinca den otro. E ta di lamenta un biaha mas, pasobra ta mustra bon cla e ora cu bo no ta compronde, of no ta sa con douane ta hinca den otro.
E ta di lamenta tur esaki. E personanan aki, den un aña di dienst, ya caba nan ta sinti con nan ta wordo balora pa nan propio minister.
Gobierno ta cambia, pero cos ta keda mesun cos
Maduro a comenta cu e tema aki, tabata un cuestion na 2009, na 2011. E tempo ey nan a sali afo. Na 2015, tempo cu Maduro tabata presidente caba, esaki a wordo treci riba mesa. Aki a logra convence e minister, unda cu a sinta na mesa, discuti, hunto cu e director y e minister, den un formacion tripartite. No manera e minister ta insinua cu ta un fabor, pasobra nan ta mal cria, pa nan no rabia. Esey no tabata e caso. E caso ta cu a bin cu e mesun puntonan, a bin cu nan na mesa, a logra convence e minister, kende tin conocemento kico Douane ta para ‘e. Eynan, den un reunion, hunto cu e director e tempo ey. Aki e sindicato a bin cu su puntonan y e director tambe. E minister e evalua ambos partido y eynan el a haya cu e punto di bista pa loke ta e siguridad di pais, pasobra bo ta bezig ta bewaak e frontera na Aruba, cual ta trabao di douane, no di un security, ni grenspolitie of imigracion. Eynan e minister a wordo convenci y den su opinion ta bal mas hopi cu simplemente dos persona cu ta draai un warda di nachtdienst, cu en realidad bo elimin’e, bo no lo bay scapa 600 mil. Te dia di awe no por convence cu cifra, Maduro a splica. Pa SADA, ta di lamenta, pasobra no ta mira nada concreto y no ta haya ningun cifra pa por compronde di unda nan ta saca e cifra di 600 y pico mil florin. Ta straño pa SADA.
Mensahe final na gobierno
Presidente di SADA, Eduard Maduro a expresa lo siguiente pa minister: Bo trahadonan bo no por trata asina. Si bo ta en berdad, manera e minister hopi biaha ta bisa den su discursonan, cu Douane ta un cuerpo hopi importante p’e, e ora dialuna tabata e momento ideal pa demostra con importnte Douane ta den su bista.
SADA a sali for di un reunion di 9’or pa 11’or di mainta y si e minister a sinti cu e trahadonan ta bal p’e, mester a yama SADA pa yega na un solucion na mesa sinta. No yama, manera a pasa siman pasa, cu ta yama djis informa y bisa cu asina cos ta. Pero manera di negosha na mesa, purba di yega na un solucion sano y positivo pa e dienst. Aki no ta pa Maduro, pa e coleganan den bestuur. Pero ta pa e dienst, cual na su turno mester traha pa pais Aruba. Si e minister no a duna e trahadonan e balor aki, ni dialuna, ni diamars, pero si ta core manda pidi un orden maatregel y bay pa un kortgeding, e ora tin cu bisa cada ken por conclui con nan ta den bista di e minister.
