Tin cambio den pueblo, segun parlamentario independiente mr.dr. Ryçond Santos do Nascimento. Por mira cu nos ciudadanonan ta mas critico. E generacion nobo tin acceso na informacion.
E ta sigui comenta cu si un hende kier informacion, e ta den bo man. Esey ta nifica cu no por gaña manera antes, no por ‘stage’ politica manera antes. Tin un cambio enorme eynan y ta mira esey refleha tambe den e manera cu hende ta vota. Pero bo ta wak e tambe refleha den e tipo di parlamentario cu tin awo.
Otro ta e dinamica cu tin den parlamento, semper ta uno cu tin e oposicion y tin coalicion. N’e momento aki berdaderamente Setty Yarzagaray ta haci falta di e banda di coalicion. No por bisa otro, segun Santos do Nascimento.
Santos do Nascimento: “Semper mi tabata critico. Semper mi tabata kier a contribui na eleva politica na Aruba. Nada di esey a cambia. Ultimo dos aña ma critica MEP masha hopi riba friends & family den e sector di utilidad (awa, coriente). Bo por mira hasta dos siman pasa mi a skirbi algun palabra fel p’e nombramento di Nelson Oduber como comisario den WEB. Bo ta wak esey ta un tendencia cu e gobierno aki a bin ta desplega, no di awo.”
Por a mira Laty Wever, a mira Robert Maduro. Asina tin un lista di nomber unda cu por mira hende cu ta acerca na partido MEP, ta haya posicion clave y pa algo e ta asina. Esey t’e caracteristica con MEP a bin ta hiba su politica.
N’e otro banda mester ta hopi honesto, cu AVP no ta mucho diferente riba e area aki tampoco. Djis si menciona nomber por ehempel di señor Hoevertsz, cu ora cu AVP t’ey, e t’ey. Ora cu AVP no t’ey mas, nan ta sac’e di e mesun mundo ey. Esey ta un tendencia cu tin desde 1986.
Por mira e caso di Benny por ehempel. Santos do Nascimento a pidi diferente sentencia despues di esun di Benny dia 14 di april ultimo. A lesa un pa un, di cual e ta hopi contento di a haya acceso na nan. Aki ta siña con e mundo aki ta hinca den otro.
Si por mira Leoncita Arends, e ta yega na partido AVP, cual ta un realidad. No por tapa solo cu un dede y bisa cu no a faborece den un forma den e caso aki. El a cumpra un negoshi pa 10 mil y a bende na 555 mil, cu tin mas hende envolvi den e deal aki, cu tin por ta vinculo cu e mesun oficina di abogado di Hendrik Croes.
Tur esaki ta parti cu por mira cu en realidad MEP y AVP a ‘setup’ un sistema politico na Aruba, unda nan dos ta wissel af. Nan dos ta goberna hunto de facto y ta mira tambe cu nan ta sali defende otro leu a leu, manera Nel a sali defende AVP y manera AVP ta sali defende MEP. Esey t’e dinamica na Aruba.
NO TA SANTO DI SU DEVOCION
Santos do Nascimento a indica den Noticiero Enfoke cu dia e pastoornan a bay cocolishi y papia cu Minister presidente over di baymento di casacion, Miguel Mansur a sali hopi fel contra e pastoornan. El a indica cu nan mester ta declara como persona non-grata, mester revoca nan permiso, mester deporta nan. Esey ta loke el a bisa. Santos do Nascimento a sali hopi fel contra su persona, unda el a skirbi un articulo cu un persona manera Mansur, no por bira un gobernante di e pais aki nunca, pasobra esey ta palabra di un dictador.
Te ainda Santos do Nascimento ta mir’e asina. Por mira cu den e caso di un acercamento di Accion 21, tin poco amor di parti di Miguel Mansur p’e.
Realidad ta si cu e partidonan manera cu Mike Eman a bisa, e ‘flight by night’, of e partidonan chikito of con cu kier bis’e, Mansur a bisa algo hopi importante.
Un tercera parti di e electorado ta votando pa alternativa cu no ta MEP cu AVP. Si ta mira e ultimo dos eleccionnan, AVP mes a bay cu 15 mil voto, cual ta un tendencia nobo, ilustrando cu nos pais ta cansa di e politica manera cu a bin ta hiba.
E speransa tabata cu den AVP lo por a bin un renobacion of un cambio na tempo. Ainda tin e speransa cu AVP ta recapacita pasobra e ta un plataforma hopi grandi. Tin hopi hende ta vota pa AVP y e ta na bienestar di pais Aruba cu nan ta cambia nan pensamento y ta bin cu reforma serio den partido.
Pero mientras cu esey no t’e caso, mientras cu e partido no ta cambia, Santos do Nascimento ta sintie yama pa bisa e berdad, tanto pa locual ta partido MEP como partido AVP. Den e sentido ey e ta un ‘Free Agent’. Su libertad di expresion ta sagrado p’e y lo e keda haci esey, Ryçon Santos do Nascimento a bisa por ultimo.
