Den Mateo 24 Cristo Hesus a spierta nos di rumor, rumor ta un mal spirito cu ta haci daño na hende , na bo cas, y hasta na un pais.
tin tres cos cu rumor ta personifica.
a) Rumor ta Sinberguensa, e no ta interesa cuanto hende wordo perhudica of engaña, of cuanto hende muri mes..
b) Rumor ta Traidor semper e ta actua tras di lomba di hende cu falsedad, y cu intriga y odio, pasobra hopi biaha rumor ta sembra Odio.
c) Rumor ta Golos e kier gara mas tanto hende posibel den su trampa di mentira, pasobra mayoria biaha den Rumor no tin berdad.
Rumor ta busca fama, y hopi biaha e ta uza hende di fama , pa haci su trabao, y ta esey nos Señor Hesus kier spierta nos. Nos ta den e tempo di hopi rumor, y ta tempo pa nos hala mas cerca Dios. Ta tempo pa nos busca Su cara, ta tempo pa oracion y yuna.
Ta tempo pa busca curashi, ta tempo pa planea, ta tempo di vision nobo. pero ta ken ta esunnan cu ta ricibi vision nobo den e tempo aki, esey ta esunnan cu no ta bay tras di rumor.
Nos ta bibando den un tempo cu diabel tin hopi mente domina,cu miedo y tur otro tipo di cos. Descurashamento, ta otro tipo di spirito malo cu ta suta nos pueblo, treciendo desanimo, casi e por bisa bo pa no haci nada mas , pero sinta un caminda warda morto, pasobra tur porta ta cera, pero awe nos kier bisa bo pa bo hisa bo bista na cielo, for di unda bo yudansa ta bini.
Como mayor bo ta pensa kico lo pasa cu mi yiunan, con nos ta sigui biba, con ta cu mañan, na unda nos lo bay, cuanto hende no ta bisa ay mi por mas, mi ta cansa , mi ta fada, mi ta malo, mi tin problema. Y cada rato bo scucha medionan di comunicacion, y bo habri bo telefon of subi riba Facebook, Whatsapp, etc. bo ta haya bo confronta cu un rumor, Pasobra Hesus a spierta nos di esaki. Den Nehemias Capitulo 6 vers 8 Nehemias a reconoce e plan di e enemigo, y a contesta na Tobias, Shambalat y Gesem cual tabata enemigonan di Jerusalem, cu locual cu nan ta manda bis’e lo no bay sosode, pasobra ta nan curason a inventa esey. Y awor den e
tempo aki tin hopi hende ta inventa maldad den nan curason, y ta expresa esey sin miedo segun 2 Timoteo Capitulo 3 vers 1 te cu 4. solamente cu e anhelo pa haci otro daño, y hasta den e tempo aki tin hende ta haci uzo di versiculo biblico, pa asina corumpi e Palabra y logra nan meta di maldad. Ay ta un dolor mira con Famia ta wordo kibra pa motibo di rumor, con hende ta cay den desobediencia na Dios pa motibo di rumor, con economia di paisnan ta bringa cu rumor. Si bo tende un rumor y bo keda ripiti mesun cos cada rato , e rumor ey ta drenta bo mente, y ta baha den bo curason, y asina trece stress y depresion den bo bida y bo hogar.
Rumor cu bo lo perde trabao, rumor di escasez di cuminda, hende a cuminsa hunga rol di Dios, hende kier haci doño di algo cu no ta di nan, hende ta haci mal uzo di nan posicion, pa manipula hende, hende ta haci manera ta depende di nan cu bo tin bida of cuminda, of placa, hende pa medio di rumor ta sclavisa otro hende su mente, pa pone bo kere cu si nan no yuda bo, bo ta muri di hamber, y tur esey ta a base di Rumor. Ta p’esey haci bo bida , bo hogar, y Famia Rumor-free, door di deposita bo confiansa den Dios todopoderoso, sabiendo cu ora bo pone bo fe den Dios lo no falta cuminda riba bo Mesa. Tambe Dios lo ta bo defensa, E lo ta bo refugio, Dios nunca lo laga bo bandona. Pasobra rumor lo no stop, pero cu bo bista fiha riba Cristo Hesus, bo Fe lo aumenta, y segun bo fe ta aumenta, ta dificil pa bo ta manipula, ta dificil pa depresion bishita bo. y ta dificil pa bo permiti hende hunga rol di Dios den bo bida.
Hesus a bisa cu nos lo tende di rumor, si hopi rumor, rumor cu kier domina, rumor cu kier cumpra bo mente cu kier saca bo for di bo Fe, pasobra tin hende cu lo bin pretende cu nan ta Dios, y ta haci manera sin nan bo no por logra. Pero para duro den bo Fe, como mayor centralisa bo bista riba Hesus. Dun’e tur honor y Gloria, cera bo wowo y oido pa rumornan falso cu kier daña e ambiente den bo hogar, y trastorna bo famia. Dios tene misericordia, y cubri nos bao di e sanger di Hesus.
Sinceramente
Pastoor Marcel Balootje.
