“Den e ultimo simannan hopi biaha nos a tende mencion di MDC y principalmente riba e tema aki tambe hopi informacion cu no ta cuadra mes, ta keda bin padilanti. Pa e motibo aki un reaccion pa clarifica informacionnan aki pa evita cu ta keda bruha nos comunidad, sector di enseñansa, mayornan y tur otro ‘stakeholder’ cu merece informacion corecto. Informacion cu ta bini di nos expertonan cu diariamente ta atende cu e tema aki,” esaki Secretario General di SEPPA Magaly Brito ta bisa den su declaracion pa prensa. .
Pa cuminsa, e ta bisa cu for di december 2017 personal di Bureau Centro Multidisciplinario (MDC) a vocifera nan preocupacionnan cerca SEPPA tocante e decision tuma di e Minister di Educacion, Ciencia y Desaroyo Sostenibel. Nan ta papia aki di decisionnan tuma cu tin consecuencia riba e personal y e servicionan cu ta duna. Pero cu alabes tin nan consecuencianan negativo pa e alumnonan cu mester di mas cuido y guia ariba e isla.
Hasta durante reunion di presupuesto na april 2018 ta sali un mocion cu fecha 24 april 2018 firma door di miembronan di Staten pa mehora e capacidad y organisacion di MdC. A urgi pa minister reuni mas lihe posibel cu e profesionalnan di MdC riba nan proposicionnan. Esaki ta e miho forma pa yega na ehecuta e metanan di atende cu e necesidad di intervencion specialisa, cu ta e di dos liña di cuido cu scolnan y alumnonan mester. Tambe a urgi pa minister sigui inverti den tempo, personal, organisacion y facilidadnan den scolnan pa mehora e prome liña di cuido. Por ultimo a pidi e minister di Enseñansa pa ehecuta e mocion aki a corto plaso, pa asina reestablece trankilidad y trece claridad den enseñansa. Loke a sosode ta net lo contrario, segun SEPPA.
Tur esaki despues cu e minister a anuncia su plannan na 2018 pa bin cu teamnan di cuido (zorgteams) pa e fundacion di SKOA y DPS, ekipando esaki parcialmente cu personal di MDC. Den e proceso tambe pa bin cu teamnan di cuido ta sali na cla cu e plan presenta ta contradictorio na locual e personal di MDC a haya conocemento di dje for di Expertise Centrum di Boneiro (EOZ).
Un presentacion organisa door di minister di Educacion na juni 2018 ultimo pa MDC, Directie Onderwijs Aruba, y Inspectie Onderwijs Aruba, a trata desaroyonan di Caribe Hulandes pa cu e cuido di alumnonan na scol. Den pasado Boneiro a traha cu teamnan di cuido cerca e directivanan di scolnan, pero e descentralisacion di e cuido pa alumnonan no tabata exitoso pa motibo di inefectividad y un insuficiencia di cuido di e calidad di e ayudo.
For di 2011 Boneiro a hustamente cambia pa centralisa tur dunado di cuido den educacion na un centro, esta e EOZ. EOZ y MDC ta haci e mesun trabao comparativamente. Locual ta duel e personal di MDC ta cu minister no a keda pa e presentacion completo aki.
E tempo aya, segun e minister di Educacion, mayornan lo a bay keha cerca dje cu ‘aparentemente’ ta tarda dos aña pa nan yiunan wordo getest na e centro y cu esaki en comparacion cu Boneiro, “e Expertisecentrum cu tin eynan, mester traha un rapport dentro di 6 siman. Y si dentro di 6 siman e no ta cla, e tin cu busca experticio di afo pasobra tin maximo 3 luna pa cumpli.
Desde cu a keda dicidi door di entre otro Directie Onderwijs Aruba pa MDC bira un dienst riba su mes, tabatin un lista di espera basta largo y un di e metanan tabata pa organisa mas miho y reenforsa e dienst pa por duna un miho servicio na e clientenan, cu ta nos muchanan. Ora Sra. van Dijk a keda apunta como diensthoofd, conhuntamente cu e team di MDC a logra di fortalece y structura e dienst di tal manera cu cierto tempo di espera a baha di mas cu 2 aña te cu 9 luna, pero tambe tabata sa cu un reto lo ta pa haya mas personal pa por baha esaki mas.
Ta bon pa compara e bezetting di MDC cu esun na Boneiro pa por wak dicon tin diferencia di tempo di espera:
• Na Aruba tin 68 scol cu MDC ta atende en comparacion cu e 7 scolnan na Boneiro.
• Na Aruba tin 11,405 alumno y na Boneiro tin 1,778 alumno.
• Na Aruba MDC tin 6 psicologo y na Boneiro tin 4 psicologo/ ortopedagogo y 10 trahado social y asistente di investigacion psicologico, y ta paga pa un psicologo priva por atende caso compleho.
• Na Aruba MDC no tin un fecha final pa entrega peticion, na Boneiro si tin tur aña un fecha final.
Un otro aspecto hopi relevante cu a sali for di e presentacion di EOZ ta cu a pesar cu nan tin nan formacion laboral completa, ainda nan tin un lista di espera. E gobierno ta enfoca riba inverti den mas personal y e conocemento di e personal. Por menciona acerca cu nan tin e recursonan pa paga psicologo y logopedistanan priva.
Di parti di e team di MDC ta compronde e retonan cu Gobierno tin awo pa cu nan presupuesto, pero e comparacion aki ta ilustra e diferencia grandi, cu minister Lampe ta keda menciona cu tin entre MDC di Aruba y nan coleganan di Boneiro, pa cu tempo di espera y con lihe un caso mester keda cla. E team ta consciente cu no por tin 25 psicologo ta traha na MDC na Aruba si ta uza e normanan di situacion na Boneiro.
