Liselotte van Doorn ta un studiante di Kozlov Dance Academy, el a participa den su prome competencia internacional di ballet (VKIBC) dianan 8 -15 di maart y tabata e unico participante cu a ricibi dos medaya plata.
Representando Aruba el a gana un medaya den ballet clasico Youth Division (entre 11-12 aña) y su di dos medaya den competencia di baile contemporaneo Division I (entre 11-14 aña). Pa motibo di COVID y e restriccion den e teatronan den New York City, e competencia a wordo haci virtualmente den bibo y directo.
Liselotte a baila riba e stage na Cas Di Cultura mientras e huesnan di companianan di ballet y scol prestigioso tabata mira mas di 125 participante di Merca, Canada, Mexico, Brazil, Paraguay, Australia, Irlanda, Zuid Korea, Hapon, Rusia, Latvia y Ukraina competi. E solo cu el a prepara hunto cu su coach Leonid Kozlov, director y meneer di Ballet na Kozlov Dance Academy tabata Paquita Variation, Lilac Fairy Variation di Sleeping beauty, y di ultimo e solo contemporaneo, In The Light of the Moon by Frederic Chopin. E coreografia ta prepara door di Mr Kozlov. Liselotte a ricibi score halto di e huesnan y nan tabata impresiona di con jong e ta y di su madurez riba stage. Comentaristanan di e competencia a declar’e ”un mucha muhe jong hopi prometedor” y ”impresionante”
Liselotte su pasion pa ballet a cuminsa prome cu el a nace. E dia prome cu su nacemento Liselotte su mama a bay wak un di e produccionnan di Mr. Kozlov The Nutcracker na Cas di Cultura. Su mama Susan ta bisa cu e por a sinti Liselotte den su bariga ta baila. Par di ora despues Liselotte a nace.
Na edad di 6 aña Liselotte a cuminsa les na Kozlov Dance Academy unda cu inmediatamente el a hala atencion di Mr Kozlov. Mr Kozlov a ripara cu e tin hopi talento. Na un edad jong Liselotte a sumergi su mes den ballet, cu varios training den siman pa varios ora. El a baila varios rol importante den Kozlov su shownan anual incluyendo Clara in The Nutcracker, Cupid in Don Quixote y Waltz Girl in Les Sylphides. Recientemente, Liselotte a ricibi un scholarship pa e continua y avansa cu su training di ballet via the EYoung Talent Fund via stichting Prins Bernard Cultuurfonds Caribisch Gebied. Liselotte a wordo acepta pa atende summer ballet intensive na Brussels, Belgica na Brussels International Ballet den juli.
Mirando cu el a gana su dos medayanan di plata, a invit’e pa participa den International Ballet Baltic Competition den zomersvakantie di 2021.
Palabra di felicitacion ta bay na Liselotte y su meneer di baile Mr Kozlov cu nan logro y ta keda en spera di mir’e briya riba tur e escenario rond mundo.
