Hulanda a manda Crash Truck usa pa bomberonan di Aruba usa na Airport
Den cuadro di cooperacion cu Aruba Airport Authority N.V. y Royal Schiphol Group N.V., Conseho di Minister di Aruba a aproba pa tuma dos Airport Crash Tenders over, cual ta trucknan special pa Dienst Brandweer Aruba (DBA) por combati candela riba tereno di aeropuerto.
E Crash Tenders ta di marca E-One, di fabricacion Mericano (Ocala, Florida), ta tecnicamente den estado perfecto di mantencion y lo yuda Dienst Brandweer Aruba pa por brinda asistencia adicional pa e proximo añanan.
Aruba ademas tin opcion pa laga haci modificacionnan special pa DBA y yega na un Service Level Agreement pa mantene e Crash Tenders den condicion optimo. E opcion pa tuma over e dos Crash Tenders a bin na un momento propicio debi cu pa basta tempo caba Gobierno kier busca por lo menos un Crash Tender adicional, pero debi na e retonan financiero no a logra haya espacio suficiente pa un inversion substancial.
Cu e dos Crash Tenders aki Aruba lo tin espacio den tempo te ora e situacion financiero recupera debidamente.
