Pueblo ta den incertidumbre y cu preocupacion grandi pa locual ta trata ayudo di FASE. Mas y mas ta e ciudadanonan cu ta vociferando nan bos mirando cu nan no ta haya contesta ni oido for di ningun instancia concerni pa locual ta trata FASE.
Diabierna mainta a drenta otro peticion pa entrevista, e biaha aki na Weg Rooi Hundo #10 cu Alex Wever cu a conta di su banda kico tur e ta pasando aden den un temporada y den situacion hopi dificil sin ricibi placa.
Wever ta conta cu e situacion ta hopi dificil pa nan na cas, nan ta hayando yudansa di stichting cu ta trece cuminda pa nan pero un esfuerso maximo di nan banda pa haya ayudo di FASE sin logra. Nan ta yama envano, si acaso nan contesta nan ta manda hende di un banda pa otro y sin por haya un contesta corecto.
Ta papia di tres luna den e situacion lamentabel aki sin entrada. Na e momentonan aki Alex ta tene su mes bezig cu obra di man pa asina purba sobrevivi paso si warda riba gobierno bo no ta logra pa paga debenan. Mientrastanto a corta SETAR y tin cu paga awa y coriente cu no ta bay warda riba hende.
Bisiñanan ta duna un man caminda nan por. Alex ta conta cu e ta un persona cu ta labora den sector hotelero y manera tur hende sa e sector aki ta para. Nan a duna tur trahado carta di trabou y manda nan cas pa asina nan por haya ayudo di FASE.
Alex ta conta cu e ta un persona cu a vota y sostene e partido na mando y ta sinti cu esaki ta e danki cu el a ricibi di nan. A regresa Aruba for di Hulanda na aña 2006 y por constata cu e One Happy Island cu ta proclama di ta, no ta asina y cu locual e ta pasando riba su mesun pais ta un berguensa pa bisa.
E tabatin masha hopi critica pa e hecho cu el a traha asina hopi aña den sector hotelero pa hiba Aruba dilanti y aworaki e ta tres luna caba sin entrada y sin ayudo.
Pa loke ta FASE, el a mustra con e ta yama y no ta haya contesta sino un voz automatico ta contesta. El a bisa cu su dede ta cansa di yama e number di FASE sin haya contesta. E hendenan cu ta papia na television, ta gaña, e ciudadano a comenta. Hasta el a comunica cu e Minister dos siman pasa, kende a bis’e cu e lo bay averigua. Y awe mainta a bolbe manda pregunta con a para cu su FASE, e contesta tabata unicamente OK.
