Rowald Tromp ta un persona cu no por traha pasobra e tin un pia cu 2 buraco den dje, pero no ta haya e yudansa necesario.
A mand’e di un porta pa otro y awo e no sa unda mas pa bay. El a haya yudansa na Cas di Speransa pero awe ta dilanti di DPL cu tur su cosnan personal. Tin critica riba Rowald Tromp cu el a hiba droga, pero niun hende ta para den su sapato pa sa e motibo pakico el a haci esey.
E sa cu niun hende kier perde nan cas y e no tabata kier a perde di dje, pero el a hunga cu su libertad y bida. E ta arepenti di haci esey y a cay cera pa 7 luna. Despues cu el a regresa Aruba su caminda di cruz a cuminsa. El a bati na porta di Departamento di Asuntonan Social (DAS) y na diferente caminda, pero no ta hayando ayudo.
El a bay bati na porta di gobierno, di Minister Glenbert Croes, kende a priminti hopi pero nada ainda. A papia cu Parlamentarionan Ady Thijsen y Rocco Tjon, pero ta bisa cu tur cos ta bay ariba Glenbert Croes. Rowald Tromp a bay DPL, nan a nenga di atende su persona y Janiro Eisden no a lag’e drenta paden. “Si bo kier troce berdad, si bo kier aparenta algo cu no ta na mi cara, papia den mi cara”, el a bisa. El a laga sa cu Rowald Tromp ta nenga di traha, pero niun momento el a yam’e of acerca su persona. Su testigo ta e director di Cas Speransa, unda cu no tabatin trabou pa su persona.
E por sinta y haci e trabou di boekhouding of algo cu su mannan. Pero niun dia a acerc’e y dun’e un informacion. Awo ta laba man y bisa cu Rowald Tromp a caba cu DPL, p’e bay y nan bah’e na DAS. El a combersa cu un empleado di DAS dos siman pasa, y nan a bisa cu nan no tin nada di haber pasobra a palabra algo cu DPL. Segun Rowald Tromp, DPL a sac’e for di hospital forsa.
Durante e reunion cu Eisden y Hodginson, den representacion di gobierno, nan a traha un plan y a sac’e contra di su boluntad y hib’e na Cas di Speransa. Niun dia nan a inform’e kico ta pasando y awo nan kier troce e berdad, pero tambe ta nenga di atende su persona. Medwork a nenga su persona pa drenta den nan lobby pa motibo cu e tin MRSA y 2 buraco, p’esey e ta punta cua doño di trabou lo lag’e drenta cu loke e tin.
E ta sclamando pa ayudo, pidiendo gobierno yud’e. E ta sinti cu nan tin e abou pa motibo di tur loke el a post riba Facebook. E kier pa tur hende realisa cu e tin e problema aki desde algun aña pasa y pa stop di mira su pasado. E no por remarca pa un cas di FCCA, pasobra e tin debe pa paga. Bati na porta di DAS a inform’e cu tin ta sinti nan mes ofendi y cu Rowald Tromp ta stroba e proceso. E kier sa con e ta stroba y su problema ta pia. Como cu e no por bin na remarca pa un cas, e ta bringando pa hisa su bijstand di 470 florin pa luna. Riba facebook el a haya 2 apartamento di 500 florin cu tur cos inclui, pero no por paga esaki pasobra e ta puntra cu kico e lo come. E ta kere cu hayando un bijstand di 950 florin e por sobrevivi.
E ta kere miho nan mand’e Hulanda pa asina e no mester ta un molester pa niun hende. Pasobra na Hulanda tin un stichting di pastoor cu lo por yud’e pa haya tur cos cu e mester. Si nan kier p’e bay traha e lo bay, pero pa niun doño di trabou kita su bijstand pasobra e no lo kier bay pasa den un caminda di cruz bek pa haya esaki.
