E aña aki ta kumpli 21 aña ku Kòrsou (Antia e tempu ei) a ratifiká e Tratado Internashonal di Derechi di Mucha.
Segun Rozendal, un bon momentu pa nos para ketu i analisá kuantu nos komo pais a logra atrabes di e añanan pa salbaguardiá derechinan di mucha pero tambe duna ehekushon na instrumentonan pa por vigilá i kontrolá un i tur si ta kumpli ku e Tratado Internashonal di Derechi di Mucha.
Gobièrnu mester kumpli ku e tratado i atendé kehonan ku drenta di siudadanonan relashoná ku falta di kumplimemtu ku e tratado i tambe kontra instansianan ku ta traha na bienestar di mucha.
Pa frakshon di MAN, bienestar di nos muchanan ta hopi importante. Muchanan mester por lanta den un ambiente seif i sigur. Liber di violensia, maltrato i abusu. Mucha mester tin e libertat pa dibertí i krese sano i felis.
Den e kuadro aki Parlamentario Rozendal a manda karta pa minister Hensley Koeiman di Desaroyo Sosial, Labor i Bienestar ku e siguiente preguntanan.
- Minister por bisa Parlamento si Gobièrnu a laga hasi un inventario pa sa si Kòrsou ta kumpli kabalmente ku e Tratado Internashonal di Derechi di Mucha?
- Si ya a laga hasi e inventario aki, por manda e resultado pa Parlamento?
- Minister por bisa Parlamento na kua instansia aktualmente kehonan, pa ku falta di kumplimentu di e tratado aki, ta drenta?
- Minister por bisa Parlamento kon ta atendé ku e kehonan aki?
