Dialuna mainta a cuminsa e bishita oficial di District Governor Trevor Blake na Aruba. Trevor ta di e isla St. Kitts and Nevis y ta e Governor di e Districto 7030 di Rotary International pa e aña aki. Aruba y hermana islanan Curacao y Boneiro ta forma parti di e Districto aki desde 1 di januari 2017.
Tur aña e District Governor ta bishita tur e islanan den su districto na unda tin un Rotary Club pa asina conoce e miembronan di e club, e communidad y e proyectonan cu ta wordo ehecuta dor di e Rotary Club local. E District Governor tabata companja pa e Assistant District Governor Rita Merkies di Rotary Club Willemstad. Rita ta fungi como e “link” entre e islanan ABC i e districto 7030 di Rotary International.
E bishita oficial a cuminsa na Stichting Casa Cuna Progreso. Rotary Club Aruba e aña aki a cuminsa duna sosten na e proyecto di “tienermoeders” di Casa Cuna. E proyecto aki ta ensera e construcion di un facilidad special pa e mamanan hoben i nan baby. Rotary Club Aruba lo ta activamente envolvi den esaki pa e aña nan cu ta bin.
Despues a sigui pa Piedra Plat na un a bishita Club Kibrahacha 60+. Na aña 1985 bao di guia di miembro honorario, sr. Eric D’Arnault, Rotary Club Aruba a funda esaki. Awe en dia, 34 aña despues, Club Kibrahacha 60+ a crece den un centro cu miembronan activo i cu ta organisa hopi actividadnan pa nos grandinan. E District Governor a haña un presentacion y un rondleiding di sr. Jeffrey Matos di e facilidadnan. E bishita na Club Kibrahacha 60+ a conta cu presencia tambe di nos Minister President, sra. Evelyne Wever-Croes.
E bishita a sigui na Y.M.C.A Dakota. Otro organisacion cu a wordo funda pa Rotary Club Aruba i pa añas ta ricibi donacion y sosten di entre otro Rotary Club Aruba. E Secretario General di Y.M.C.A. Sr. Rhomyko Winklaar a elabora ariba e organisacion y actividadnan di Y.M.C.A. Despues a sigui un rondleiding di e lugar.
Anochi, durante e reunion semanal di Rotary Club Aruba e District Governor a hanja oportunidad pa topa cu otro miembronan di Rotary. Miembronan di Rotaract i Interact tambe tabata presente na e reunion special aki.
District Governor a hiba palabra na unda e la indica di a keda masha impresiona cu e proyecto y actividad nan di Rotary Club Aruba, Rotaract Club Aruba y Interact Club Aruba. E la gradici tur miembro pa nan aporte na e communidad di Aruba i na Rotary su idealnan.
Presidente di Rotary Club Aruba América Barrios ta sigur hopi contento cu e bishita importante aki. América kier gradici tur miembro di Rotary Club Aruba un biaha mas pa nan trabao boluntario cu nan ta hasi pa e club y e communidad di Aruba. Esaki ta inclui e miembronan di Interact Club Aruba y Rotaract Club Aruba.
