TOP Traineeship na Boneiru ta haña un kontinuashon na sèptèmber 2018. E programa di dos aña ta ofresé profeshonal hóben na Hulanda un oportunidat úniko pa bai traha na e isla karibense na un di e hopi organisashonnan dentro di e sektor públiko.
13 i 14 aprel ta tuma lugá e enkuentronan di rekrutashon i informashon, organisá pa Stichting WeConnect. TOP Traineeship ta un inisiativa di ministerio di Interior i Relashon ku Reino (BZK) i ta kontinuá esaki den koperashon ku Entidat Públiko Boneiru (OLB).
Dunadónan di trabou
Meskos ku aña pasá, OLB, kompanianan di gobièrnu i Rijksdienst Caribisch Nederland (RCN) ta ofresé lugá pa trainee. E organisashonnan, funshonnan i enkargonan ta diverso pa loke ta trata kontenido. Aña pasá institushon di kuido Fundashon Mariadal, Tourism Corporation Board, Zorgverzekeringskantoor, i OLB a pone lugá di trabou disponibel. Despues di un aña piloto ku 6 trainee, pa e ròndu ku ta bini tin mas organisashon lokal entusiasmá pa partisipá. Potensial dunadó di trabou nobo ta Ofisina Sentral di Statístika, Selibon (prosesamentu di sushi), Mental Health Caribbean i otro sekshonnan dentro di OLB i RCN.
Konsehero di maneho Patricia Gerritzen-Veen di OLB tokante eksperensia ku e traineeship: “Energia, renobashon i inspirashon, e traineenan ta trese Boneiru. Algu ku ta bonbiní di kurason dentro di OLB. Komo ún di e dunadónan di trabou mas grandi – i naturalmente komo aparato gubernamental – nos ta sostené e proyekto aki di kurason. Nos ta satisfecho ku e koperashon ku BZK i nos trainee di TOP i p’esei sigur sigur ta sigui ku e koperashon.”
Eksperensia di trainee
E traineenan aktual ta satisfecho. Stephen Elizabeth, awor mas ku mei aña trahando komo Konsehero Empresarial na institushon di kuido Fundashon Mariadal, ta kontentu ku e reto: “Partisipando na TOP Traineeship, mi ta haña oportunidat pa por apliká mi konosementu i eksperensia atkirí na e manera korekto den práktika i na mes momentu amplia mi horizonte, asina mi por sigui desaroyá mi talentonan.”
Desaroyo di talento
Judith Brekelmans ta Rekrutadó pa TOP Traineeship Bonaire. E ta enfatisá kon importante ta ku profeshonalnan hóben ku desendensia karibense, kontal ku nan ke esaki, por haña nan kaminda bèk pa e merkado laboral lokal, den e kaso akí Boneiru: “Nos mester invertí den kapital humano i desaroyo profeshonal di trahadó. Ku hasi mudansa mas atraktivo i ku ofresé un programa di training, TOP Traineeship ta duna un kontribushon importante.” Traineenan ku ta hasi e kambio akí ta djòin e grupo di partisipante lokal (personal aktual) di TOP Bonaire. Huntu nan ta sigui un programa di training trahá na midí.
Bon bini
Stichting WeConnect komo partner na Hulanda ta trahando duru ku organisashon di enkuentro di rekrutashon, dirigí riba profeshonal hóben ku rais i afinidat karibense. 13 i 14 di aprel, studiantenan ta bonbiní respektivamente na Den Haag i Tilburg. WeConnect ta hasi un yamada na esnan ku a kaba studia na nivel di HBO i WO (òf esnan ku ta kaba studia e zomer akí) pa inskribí nan mes pa e enkuentronan. “Nos ta buska kandidato ku diverso background di estudio, pues independiente di kua estudio bo a terminá, inskribí bo mes”, Tanja Fraai, manager di WeConnect, ta bisa.” Esei por via e lenk akí: http://www.weconnectworks.nl/evenementen/
