El a wanta net 1 aña y 5 luna den e funcion aki. Tabata na luna di mei di aña 2019 cu miembronan di Conseho di Supervision a nombra Roland de Cuba como director general na Fundacion Parke Nacional Arikok. Hunto cu e director di conservacion, Natasha Silva, ta forma directiva di FPNA y ta encarga cu maneho diario di e fundacion. Pero, e siman aki e mesun Hunta di Supervision a anuncia na e trahadonan cu Roland de Cuba no ta den servicio mas di parke.
Parce cu pa algun luna caba e no ta presentando mas na trabou. E hunta di supervision, encabesa pa Norman Kuiperi a purba tur manera pa convence de Cuba pa cambia di su decision, pero finalmente el a entrega su carta di retiro dia 9 di october utimo. Den su carta el a laga sa cu su decision ta pa rason medico y cu su decision ta final. E directiva a sigura cu nan a perde un bon director, cu a maneha e parke bon. Pa awo, Natasha Silva ta sigui na timon di e fundacion cu ta maneha, entre otro, Parke Nacional Arikok.
Como director general Roland De Cuba tabata dedica su mes principalmente na e maneho general di e fundacion. Esey ta encera cu hunto cu e Director di Conservacion a traha duro riba profesionalisacion di e organisacion. FPNA ta un organisacion cu actualmente tin areanan di naturalesa bou di su cuido di alrededor di 20% di e superficie di nos isla, ademas di un parke marino. Adicionalmente Roland de Cuba tabata encarga tanto cu renobacion di edificio- y camindanan di Parke Arikok como optimalisacion di fluho di bishitante.
Di prioridad halto, na momento cu a apunt’e aña pasa, tabata tambe e negociacionan pa un contrato colectivo pa trahadonan; en particular restructuracion organisacional y desaroyo di un structura di funcion y di compensacion. Un otro tarea tabata compila of actualisa plannan di maneho pa e diferente parke y area natural bou di maneho di FPNA.
