Diadomingo awor nos ta celebra nos dia nacional, nos dia di Himno y Bandera. E fecha 18 di maart cu desde aña 1976 nos ta celebra despues cu a introduci nos bunita bandera y “Aruba Dushi Tera” como nos himno oficial. Nos ta considera e fecha aki esun mas importante pa Aruba como cu nos ta celebra nos Status Aparte y kico tur esaki ta nifica pa nos como pueblo y pais.
E dia aki nos ta celebra manera un pueblo, sin mira color politico, sin mira nos diferencianan. Nos tur cu ta yama nos mes Arubiano lo celebra den union. Sea cu bo ta yiu di tera cu a nace akinan of como persona cu a bin biba aki y contribui na desaroyo di nos pais. Nos tur ta sinti amor y aprecio pa e pida baranca cu nos por yama cas.
E momento aki ta uno oportuno pa enfatisa cu tur decision cu ta tuma, sea den gobierno of parlamento, nos ta haci na bienestar di nos pais. Un cos cu tur miembro den e fraccionnan ta di acuerdo, ta cu nos tur kier mira desaroyonan positivo pa Aruba. No ta importa ki diferencia nos por tin den opinion, na final nos como politico ta pasahero, pero e impacto cu nos por laga atras ta duradero. P’esey ami ta orguyoso di por bisa, cu mi ta un Arubiano, cu ta y lo sigui traha duro pa nos dushi isla Aruba.
Mi ta desea pueblo di Aruba un feliz Dia di Himno y Bandera. Sea orguyoso y agradecido cu nos ta biba den un paraiso, unda solo ta briya tur dia y hunto nos por sigui hiba Aruba pa un futuro briyante pa uni tur.
