Diaranzon mainta Minister Glenbert Croes y Minister Rudy Lampe a bishita e instancianan Dununman, Man na Obra, Briyo di Solo y Bibito Pin cu ta resorta directamente bou di Stichting Verstandelijk Gehandicapten Aruba.
Un mainta sumamente educativo y ‘eye-opening’. For di e momento cu a cuminsa cu un recorido visual na Dununman, loke a impresiona e Ministernan presente ta tur locual e muchanan sumamente special aki ta siña, obra y produci.
Despues di e prome encuentro, Minister Glenbert Croes a continua cu su bishita na Bibito Pin, Pasadia Briyo di Solo como tambe Man na Obra. Manera Minister a expresa: “Mi a keda impresiona cu e bunita trabou di e trahadornan, docentenan, asistentenan, lidernan y e dirigentenan”. E amor y dedicacion cu a keda refleha den e trabou di cada un, ta uno cu nos como Mandatario mester aprecia y balora. “P’esey ayera imediatamente mi a expresa mi apoyo total na tur, y cu nan lo por conta cu mi pa drecha nan posicion huridico. Tur merece e compensacion husto pa e bunita trabou cu nan ta desplega”, asina Minister a declara.
Locual cu mas a impresiona Minister tabata e momento cu el e yega Man na Obra y por a mira cu su propio wowonan con nos hendenan special tabata laborando riba empake y produccion di productonan cu un compania netamente local ta bende den su tienda. Minister tabata testigo di e obra di man cu kwihi, obra di man cu bela cu nos Hendenan Special ta produci na Man na Obra. “Di mi banda e apelacion riba comercio local, integra nos hendenan special den e produccion di productonan di bo compania. Bo ta duna nan bida special, contenido. Bo ta duna nan bida special, dignidad formando parti di bo producto”, Glenbert Croes a termina.
En todo caso e Mandatario a sali determina di e recorido aki pa duna apoyo y asistencia total na Dununman, Man na Obra, Briyo di Solo y Bibito Pin. Nos hendenan special tin derecho riba asistencia special. Pero esnan cu ta labora den e ramo aki tambe tin e derecho riba atencion special y di Glenbert Croes como e Minister encarga cu Asunto Social sigur nan tin e.
