“Mi a tuma nota di diferente acusacionnan serio contra mi persona cu ta circula rond den media. Ta di lamenta cu oponentenan politico y nan simpatisantenan ta purba di hiba un politica sushi y bou nivel durante un periodo unda cu Aruba tin mas mester di representantenan serio, responsabel y integro”, asina Rocco Tjon, candidato # 5 riba lista di MEP, a skirbi awe tardi despues di a tuma nota di acusacionnan serio atrobe contra dje. Solamente e biaha aki no ta di un politico of fanatico, sino di un testigo den e caso contra dje, unda hues civil a kita su derecho di por mira su prome yiu muhe.
Ta trata aki di un caso cu a sosode como 11 aña pasa, unda awo su yiu muhe ta na scol secundario caba pero te awe no kier mira su tata pa nada di mundo. E yiu, tempo cu e tabatin tres aña, a bisa cu su tata ta hacie hopi dolor na su parti delicado, ora di bañ’e. Juffrouw di scol a duna declaracion y por lo menos un polis a pone riba papel locual el a scucha e mucha inocente conta e tempo aya. E polis a bisa cu desde cu el a sali pa e mucha, a persigui’e di tur forma, den cual te hasta casa di Tjon, esta altocomisario Vanessa Tjon, a purba kit’e di trabou pero hues a destrui su decision. Paola Kock a bisa awe cu “ta basta” y no ta sconde mas y no ta keda keto mas, e kier pa pueblo sa ken e ta cla pa eligi aki pa ta e homber mas poderoso den husticia di nos pais.
“Mi no ta participa na e nivel baho cu oponentenan ta hiba. E acusacionnan haci contra mi persona a wordo prueba den corte di ta falso. Pues, no tin ningun base pa e argumentonan haci. Mi abogado lo manda un carta pa atende cu e situacion lamentabel. Falta par di dia pa eleccion. Mi a demostra mi seriedad, integridad y responsabilidad como parlamentario e ultimo 4 añanan. Mi compromiso cu pueblo ta pa sigui traha na bienestar di nos isla”, asina e parlamentario cu ta aspira e puesto di Minister di Husticia a termina bisando.
Loading…
Reload document 
Open in new tab Rocco Tjon a hiba un lucha largo pa por a demostra su inocencia. E tabata compaña cu un empleada di Ministerio Publico, mientras e tabata un hefe di polis, bou unda hasta Jeugd en Zeden Politie tabata resorta. Na dado momento e pareha a laga otro y su tras a bin e acusacion. Na un prome instante Procurador General a pensa cu esaki ta un guera di e mama contra e tata, pa motibo di jaloezie. Pero masha lihe a bin ripara cu memey tabatin un criatura di tres aña cu tabata sclama pa husticia pero no kier a ker’e, pasobra su tata ta polis y su mama ta traha pa fiscal. Ambos mayor tabata mucho cerca di e candela y pa via di nan trabou, ata e mucha a keda para su so y sin ningun orea pa scuch’e. E psicologo di mucha cu a atende su caso, no por a traha den e caso penal y a bandona Aruba y hasta a skirbi un buki despues, pa mustra con casonan ta bay na Aruba.
Ta despues di tempo, ora cu berdad Ministerio Publico a dicidi cu e no ta investiga ni persigui Rocco Tjon, cu e mama a sigui insisti, a apela na Corte Comun di Caribe Hulandes y unda tres hues tampoco a mira necesidad pa persecucion, cu e mama a purba su suerte e ora na corte civil. Ey no a trata e pregunta cu si e tata berdad a mishi cu e yiu muhe chikito of no, sino a trata kico ta miho pa e criatura. Como cu e mucha y tur investigacion tabata mustra cu e no kier y no por atende cu su tata, cu un hues a dicta cu pa bienestar di e mucha, cu e tata no mag mir’e te ora e bira grandi.
Awe un testigo den e caso a sali afo y kier pa comunidad sa kico a pasa y ta di ki tipo di hende ta referi na dje awendia pa asumi un puesto asina importante sea den parlamento of den gobernacion. Pueblo entretanto a keda den shock di e entrevista di ex-recherche Paola Kock, cu a habri su curason y basha abou tur locual cu pa demasiado tempo el a wanta pa su mes.
