Diamars anochi e obra di Tula a haci su premier na Corsou y nos talento, cantante local Rocco Franken a hunga un rol den esaki. E rol cu Franken a hunga ta di Caspar Lodewijk van Uytrecht. Rocco a hunga doño di plantacion den e storia aki cu ta basa riba hechonan real cu algun ficcion pa trece esaki pa henter comunidad, mucha y hende grandi. Tin algun escenanan cu no a bay mucho profundo pa via di esaki.
“Mi ta e shon cu ta manda suta e trahadonan cu no ta traha, esun cu ta comanda, manera e tabata ta e temponan aya, den e storia aki ami ta esun malo.” E obra a keda presenta na scol, un poco adapta pa asina por presenta esaki n’e muchanan pa nan por compronde con e storia a bay y kico e lucha tabata ta.
E cantamento na Hulandes sigur tabata tin su reto segun Franken, e actuacion riba su mes tabata un reto. “Pero mi a traha hopi duro y di cerca tambe cu un bon amigo di mi cu tambe ta haci musicals na Hulanda, tambe cu director di e produccion aki.” E ultimo siman di februari, Franken ta conta cu a bini pa train tres fin di siman cu henter e elenco y ultimo a bin dia 9 di april te cu 16 april pa training general, prepara paña, y tur otro detaye necesario p’e obra su prome presentacion.
E ta un rol hopi importante pa Franken cu ta trece e dinamica di con tabata biba y convivi e tempo di sclavitud, Shon mas cu claro tabata abusa di su poder. E banda di e catibonan, nan tabata esnan menosprecia, cu tabata keda maltrata. “Pa mi tabata un honor di por haya e rol aki y ta parti di un historia, pasobra ta prome biaha ta pasa na Corsou aki. Na nos islanan ABC, un musical di e magnitud aki ainda no a tuma luga, dus pa mi ta honor di forma parti di esaki,” segun Franken. E intencion ta pa bay cu e obra aki na Aruba, y Franken ta sigur cu na Aruba tambe tin ingredientenan pa traha un musical specialmente p’e pueblo di Aruba. Tin suficiente balor di entretenimento den storianan cu a pasa den realidad den Aruba su historia, por pone algo riba mesa pero ta keda na cada un pa pone e granitonan pa cu esaki segun Franken.
