Parlamentario ing. Mike de Meza (AVP) ta bisa cu a tuma nota con Minister Glenbert Croes a converti su mes den un ‘oil trader’ dus un persona biahando rond mundo pa purba haya azeta. Esey ta lastima pasobra pa haci e tipo di trabao aki ta uno specifico segun de Meza cu specialisacion specifico rekeri. “Esey ta e sistema na Aruba awendia.”
Minister Glenbert Croes a caba di bini for di New York anto informa pueblo cu el a haya un barco di fuel oil mas barata. AVP tin diferente pregunta p’e minister cual lo haci por escrito tambe. Minister Croes ta papiando di rebahonan substancial pa loke ta e costo di fuel oil. “Nos ta interesa den sa ta cua contract di fuel oil el a cera aki, di unda e ta bini, na ki prijs a cumpr’e, y si ta un spot deal el a haya of contract pa termino largo.”
E parlamentario ta splica cu ta hopi importante pa sa e descuento cu minister Croes ta papia di dje, y over di kico e ta, pasobra por a tuma nota con a bay Ecuador caba unda a bisa lo tabata yegando na un acuerdo cu gobierno di Ecuador pa haya rebaho substancial. Aki tabata papia di por lo menos 20-25% of mas e tempo ey. AVP a cuestion’e e tempo ey pasobra e ta un locura segun de Meza. Si bo conoce e mercado y bo sa kico ta e dinamica den e industria aki, y analisa cua ta e companianan cu e ta acerca, bo ta mira cu ta ‘fabeltjes’ manera ta bisa na Hulandes, of dus mito, puro storia segun de Meza.
“Ecuador ta un di e paisnan pober, si bo wak su GDP per capita por ta ta un 6 of 7 mil dollar pa cabes – esun di Aruba ta ariba di 35. E ora ey con un pais cu acerca di esey tin por lo menos 20 pa 30% di su comunidad cu ta biba den pobresa, bo ta papia di un pais di 15 pa 17 miyon hende. 5 miyon ta biba den pobresa y lo bay subsidia un pais manera Aruba.” Na final di dia segun de Meza, por a mira con esaki a resulta na nada. Despues a mira con minister Croes a bay Hulanda, Spaña, bin cu Hydrogen Valley, e contract di LNG firma unda ningun hende no sa kico ta hinca aden despues di dos aña y nada a tuma luga tampoco pa cu e contract aki.
ENGAÑO TRAS DI ENGAÑO
Aworaki atrobe segun de Meza despues cu minister Croes a declara cu aparentemente lo a haya gas den awanan teritorial di Aruba, cu tur hende lo bira miyonario na Aruba. “Nada no a tuma luga. Esaki ta un proyecto cu gobierno di Mike Eman I y II a traha seriamente riba dje cu companianan sumamente grandi manera REPSOL, Shell y hopi mas. “Lastimamente nos tin di bisa cu nos a yega asina leu cu despues di entrada di Gabinete Wever Croes cu despues di algun luna e proyecto a para. Y awor den porta di eleccion, e minister aki kier haci tur sorto di promesa y engaño pa motibonan puramente politico di eleccion.”
