E temporada d horcan a cuminsa y manera tur aña tur pais ta prepara p’e temporada aki. Den e ultimo añanan a ripara cu e patronchi di horcan a cambia, pasobra momento cu nan drenta Caribe, nan ta bin mas abou. Esaki ta trece cu ne preocupacion pa Bureau Rampen Bestrijding Aruba (BRA).
Director di BRA, Rino Hermans, a splica cu normalmente e temporada di horcan ta entre prome di juni y 30 di november. E prediccionnan di e aña aki ta mustra cu ta bay bek na normal. Ta predica pa tin entre diesdos y diesshete sistema tropical cu lo haya un nomber. Un pa nuebe di nan lo bira horcan y di e nuebe nan ey, un pa cuater di nan lo bira categoria tres, cuater of cinco.
El a sigui splica cu lo tin un aña cu practicamente ta bay bek na normal. A custumbra cu diesdos sistema lo haya nomber. E aña aki ta diesshete, di cual seis pa shete lo bira sistema y e aña aki ta bira nuebe. Esaki ta e efecto di El Niño cu ta den region Atlantico.
Patronchi a cambia
E pregunta cu ta bin dilanti ta con activo e lo ta den region di Aruba. Hermans a splica riba e patronchi di cual ta un preocupacion pa nan. E patronchi di horcan ta pafo di Caribe of nan a bin hopi zuid compara cu aña pasa. Aña pasa tabatin cuater close call y un di nan tabata warning, cual tabata Bonny.
Patronchi di e sistema climatologico den region ta haciendo efecto. Antes ta custuma cu nan ta drenta Caribe, cambia direccion y bay e islanan ariba manera Cuba, Puerto Rico, Florida. Pero awo nan ta keda bay hopi zuid, pasa raspa e islanan di Aruba, Corsou y Boneiro pa bay dal den peninsula di Mexico.
Preparacion
Preparacion p’e temporada aki a cuminsa. Segun Hermans, tin un maneho cu asina mei habri, prome cu dia 15 di mei, minister presidente ta manda instruccion na tur departamento pa revisa nan plan y mira e capacidad, y prepara p’e temporada di horcan. E unico cos cu nan no ta haci den luna di mei ta haci un training di horcan. Esaki ta debi cu tin vakantie di scol y ta regresa den e peak cu ta augustus, september y october. Loke nan a haci ta bolter e secuencia di training p’e departamentonan. Na momento cu scol habri, dos siman despues nan ta train.
