Proximamente Parlamento di Aruba lo trata dos ley di presupuesto. E dos leynan ta encera e presupuesto 2023 di e Tourism Product Enhancement Fund (TPEF) y e presupuesto 2023 di Dienst Openbare Werken (DOW).
Lo trata e dos leynan aki den e siman di 16 di januari venidero. Segun e planificacion di Parlamento di Aruba, lo trata e ley di TPEF riba dialuna 16 di januari y esun di DOW riba diahuebs 19 di januari 2023.
E inversionnan di TPEF
E fondo di mehoracion di producto turistico tin diferente categoria den cual e ta inverti. Entre otro den medio ambiente, atraccion turistico, cultura & herensia, investigacion & desaroyo y contingencia. E inversionnan pa 2023 ta entre otro den mantencion y mehoracion di e strip di Eagle Beach. Tambe lo construi un ruta di cana for di Marriott Hotel te cu Palm Beach Plaza. Banda di esey, e TPEF lo inverti den cultura y herencia caminda lo bay traha na e mantencion di diferente museo riba nos isla.
E inversionnan di DOW
Manera t’e meta di DOW, ta pa construi caretera y mantene e infrastrtuctura di pais Aruba. DOW ta enfoca entre otro tambe riba habri caminda pa construccion di e parcelanan nobo y mantencion di e sistema di riolering. Den 2023 DOW lo bay enfoca na reconstrui e caretera(nan) dilanti di e hotelnan grandi. Esaki lo sosode den fase pa asina mantene e fluho di trafico. Di e forma aki DOW lo bai mehora e caretera uza tanto p’e empleadonan den sector hotelero, taxista, bishitante y nos localnan. Banda di e area turistico, DOW lo bay pone algun caretera di asfalt nobo den algun bario rond di nos isla.
Beneficionan pa Aruba
Tratando y aprobando e dos leynan aki den Parlamento, Aruba lo bay beneficia di un calidad mas halto di e producto Aruba. Esaki ta haci cu tanto nos bishitantenan y nos localnan lo por sigui bishita nos museonan y haci uzo di areanan turistico of por bisa tambe areanan cerca di lama cu ta ofrece ruta pa cana y careteranan den bon condicion.
Gobierno di Aruba a proclama aña 2023 como Aña di Union y Positivismo. Y den cuadro di esaki, nos tur lo sigui traha hunto na e reconstruccion y desaroyo di nos pais Aruba den un forma positivo.
