Minister di Husticia mr. Andin Bikker a apunta onder-inspecteur Richard Kramers cu e encargo di manho diario di Guarda nos Costa. Esaki despues cu Trudy Hassell a participa ayera na e minister en esencia cu e no ta disponibel mas pa sigui cu e encargo diario di Guarda nos Costa.
Trudy Hassell, cu ya den pasado tabata na mando di e organisacion, a bolbe dirigi esaki desde juli 2018 caminda a logra entre otro pa e organisacion bira un dienst riba su mes na 2019, a zorg pa haya material di trabou necesario pa personal cu tabata pendiente pa varios aña, a tene controlnan severo y a zorg pa cuminsa atende e falta di localidad y infrastructura adecua pa por retene personanan cu no tin status legal bou di e Landsverordening Toelating en Uitzetting.
E cierre di fronteranan a base di e pandemia di Corona-virus, e hecho cu a detene mas persona sin status legal durante controlnan entre otro di e shelter in place y toque de queda, den combinacion cu e falta di localidad adecua pa por retene personanan cu no tin status legal, a pone cu e ultimo lunanan e circunstancianan na Guarda nos Costa a bira uno hopi tenso. Entre otro mester a zorg pa urgentemente cuminsa atende e falta di localidad y infrastructura adecua y reenforsa e vigilancia na GNC cu cooperacion di KPA y CEA, ya cu tabatin varios incidentenan di huida. Tambe tabatin varios casonan di menasa contra di e personal di GNC dor di detenidonan cu a manda for di KIA despues di a sinta nan castigo penal.
Richard Kramers di su banda a observa e ultimo simannan, den cuadro di e refuerso di KPA na Guarda nos Costa, e retonan di GNC y e personal di cerca. Tambe el a presencia varios reunion hunto cu e minister, CEA y personal di GNC, pues hunto cu su experiencia y estudio ta un persona sumamente califica pa por sigui cu e trabounan di Trudy Hassell.