Den e reunion di Conseho di Minister di Reino na Den Haag awe mainta, Minister Plenipotencario a probecha, aunke Aruba no tabata riba agenda, pa no lubida e carta di CFT y cu Aruba ta mas avansa pa cumpli cu e condicionnan poni door di Hulanda pa haya ayudo.
Por corda cu for di mei caba tin un carta di CFT cu ta splica cu Aruba ta cumpli cu tur rekisito pa ricibi e di tres tranche. Tabata Hulanda cu despues di palabracionnan haci caba, a bisa cu nan ta bay pone condicionnan adicional pa Aruba. Esaki ta principalmente relaciona cu un organo cu ta bay maneha e placa di ayudo cu Aruba ta haya pa su deficit presupuestario y inversion.
A informa CdM di Reino cu tin algun punto cu Parlamento di Aruba ta haya ta inaceptabel. A pidi nan pa pensa hunto riba solucionnan riba loke huridicamente ta un estorbo pa yega na un cooperacion concreto. “Ban traha riba esaki. Mi mensahe tabata pa dialoga y kita un poco di e postura intransigente cu e negociadonan tin, den nomber di Minister. Ta trata di funcionarionan halto di Gobierno cu tin pensamento di con cierto cosnan mester bay, pero cu tin biaha no ta cuadra cu e aspecto social y huridico di e pais. Mi mensahe tabata pa keda habri den dialogo, pasobra Aruba a cumpli cu tur rekisito pa e di tres tranche mientras cu Corsou ainda ta trahando riba e di dos tranche.”
Segun Besaril, el a sinti cu e dialoga ta habri y a pidi cu si yega na un acuerdo prome cu 11 di september, pa e Minister Knops y Hoekstra tin autoridad di Conseho di Minister di Reino pa duna Aruba e di tres tranche. Esaki ta un punto cu a keda habri riba mesa. “Ban kita e punt y komma cu ta fastioso pa yega na un situacion cu ta beneficioso pa Hulanda y Aruba.”
