Despues di 11 dia cu e brote di Covid-19 a cuminsa aki na Aruba por bisa cu tin otro grupo cu a recupera. Awe segun protocol nobo por a cuminsa duna autorisacion na algun persona pa sali di isolacion y registra nan riba lista di esnan recupera.
Awe un total di 49 persona mas a recupera y di e forma aki Aruba ta cuminsa riba e caminda di recuperacion atrobe.
Mientrastanto pa loke ta casonan nobo 79 persona a test positivo, cu ta menos cu e cifra di casi 100 ayera. DVG ta bisa cu e instruccion ta pa comunidad sigui cumpli cu e medidanan di proteccion y higiena na tur momento.
E brote nobo aki a cuminsa despues di apertura di frontera hunto cu apertura di discotecanan, unda cu por bisa e contagio masal a cuminsa y cu tabatin e repercucion cu e tin awo di un cifra basta halto. Por bisa cu e di dos ola a cuminsa realmente den e bida nocturno di Aruba y por mira esey tambe cu un grupo grandi di esnan positivo y cu a sigui contagia otro ta edadnan adulto hoben.
E cantidad di casonan positivo ta 973 di e casi 16 mil testnan cu a haci, di cual mayoria ta cuminsando casi 2 siman pasa.
Den e di dos ola di brote di Covid-19 tin un caso mas di morto registra, aunke cu autoridadnan a bisa cu e no a fayece a causa di efectonan di Covid-19 ya cu e tabatin un otro cuadro medico.
